editorial 2_15_1.jpg

Ayera manera ta custumber, nos por a presencia un celebracion di Dia di Himno Y Bandera manera por ser spera. Un dia di pone un banda tur diferencia di opinion tocante e topiconan cu normalmente ta domina noticia y discusion den nos medionan di comunicacion. Un dia cu nos no ta papia di deficit y problema financiero, di GDP cu a crece o a keda atras, medida cu no mag yama medida pero no a bisa ta con e mester yama anto; un dia unda nos keho y criticanan ta keda pa loke nan ta y nos ta celebra e hecho cu nos a nace of a bin biba den un pais bendiciona, cu semper ta logra sali di tur desafio cu presenta nos dilanti. Aruba no ta sorprende nos mes so, e ta sorprende otro hende tambe cu conoce nos region hopi bon y ta keda semper asombra cu na Aruba tin un ambiente diferente, un ambiente crea pa su hendenan, cu ta hacie sobresali riba su bisiñanan, aunke cu esey nos no kier bisa nada negativo di nan.

Y ta bon tambe cu nos tin e tipo di dianan aki, unda por mustra union y civismo, den nos pais cu normalmente ta parce un luga unda ta parce cu tur cos ta ser midi segun e color di e partido cu ta apoya. Nos no tin ningun duda ni discusion tocante nos Himno Nacional, ya cu nos tur ta di acuerdo cu loke ta aparece den su letra ta exactamente loke nos ta sinti. No tin ningun discusion tampoco tocante esnan cu tabata responsabel pa melodia y letra; e ta nos Himno, punto.

Pero ora nos a haci un recorido riba nos isla ayera, manera un gran parti di nos pueblo a haci riba dia di ayera, pasando rond wak kico tin di haci, ta bira bisto cu e problema di e color di bandera no a keda resolvi. No solamente e ciudadano ta confundi, esnan cu ta importa material aparentemente ainda por importa material di tur color, basta e ta blauw… Hasta pa e celebracion dilanti  Oficina di Gobierno e matanan tras di e tarima tabata dorna cu algo cu tabata acerca mas bien e blauw scur di nos hermana isla, en todo caso no e blauw original cla, ni e blauw un tiki mas scur cual a keda introduci algun tempo pasa.

Talbes ta mustra un poco fastioso pa trece e tema aki dilanti, un dia despues cu, asina leu cu nos por a observa, tabata un dia festivo manera mester ta, cu yen di actividad no solamente riba e dia mes, sino tambe den preparacion pa e dia na diferente scol. Aki nos por a mira cu un cantidad di scol y maestro tabatin hopi tempo di antemano preparando presentacion completo unda henter scol a participa, creando un ambiente cu e mayornan lo mester a aprecia. E balor cu esaki no ta solamente riba e dia mes, pero esaki ta e estimulo cu nos mester como comunidad pa lanta den nos muchanan e sentido no solamente di patriotismo, pero tambe di bon comportacion como ciudadano. Esaki ta importante pa por combati e tendencianan negativo cu nos hubentud ta confronta, variando di oferta di droga te na formacion di gang cu ta hasta menasa siguridad di nos muchanan na scol of den bisindario directo di scol, manera nos por a presencia algun dia pasa mes.

E problema di e color di bandera ta bay mas leu cu a primera bista nos por kere. No ta un berguensa si un stranhero mester puntra nos con nos bandera nacional ta, anto nos no por bisa cu siguridad ta ki color di blauw e ta. Cu esey si nos a gana premio pasobra esey si ta algo unico na mundo, cu e unico pregunta cu nos por duna awor ta:”any color as long it’s blue”. Nos sa cu un color blauw a keda aproba pa nos Parlamento, y lo ta logico pa bisa cu esey anto ta e color. Pero ta trata tambe di aceptacion ora ta trata di algo cu no ta cuminsa awor perp tanto aña pasa caba. E unico manera pa resolve e problema ta cu ta saca e asunto aki completamente for di ambiente politico y, una bez nos tin un color defini, percura pa impone supervision tambe. Na e momento aki cada ken por importa e color blauw di su gusto y no tin ningun sancion riba esaki, cu ta realmente ta un ofensa na nos dignidad nacional. Ta bira tempo pa coregi esaki, sin hacie un debate entre geel y berde…

LEAVE A REPLY

Please enter your comment!
Please enter your name here