Dialuna ultimo despues cu e gremio di musico y entretenimento a sostene un reunion na Departamento di Cultura Aruba (DCA), mayoria di nan proposicion cu nan a bin negoshando pa algun tempo cu Crisis Team, a bin riba nan mesa di dialogo na DCA. Nan tur a conclui cu un peticion fundamental ta: E posibilidad pa laga nan traha.

E musico Ofo Escudero kende ta presidi e asociacion nobo Aruba Entertainment 2020 a bisa cu nan punto principal ta cu “nos tin cu traha.” E gremio di musico y tur esnan envolvi den mundo di entretenimento ta anhela cu entrante 1 di februari e situacion di nan lo por bira un tiki miho.

Pero esaki ta depende den gran parti si e casonan di Covid no sigui subi. Es decir si e casonan no lo sigui subi por bin cambionan den e protocol cu por permiti cu nan lo por traha, ya cu esaki ta e parti cardinal pa nan, esta traha.

Aworaki -segun e medidanan introduci- solamente un persona por traha como musico, y no como agrupacion musical. Locual nan kier ta cu gradualmente e reglanan ta wordo flexibilisa y di un musico nan por bay pa cinco musico.

Tambe e ta haya fundamental cu mester duna e comerciante e stabilidad cu e sa cu cierto protocol ta bay dura pa un tempo cu e por organisa miho su operacion. Escudero a indica cu e parti mas dificil aworaki ta cu e protocol ta wordo cambia di repenti, practicamente di un dia pa otro.

Reunion

For di luna di maart di aña pasa e sector aki di entretenimento a resulta hopi golpia debi na e pandemia di Covid y tur e medidanan cu a bin cune pa evita e contagio, entre nan distanciamento social y evita aglomeracion di hende. Un gran parti di nan ta depende directamente di e actividad aki y nan ta practicamente man crusa pa varios luna caba.

Sinembargo mirando loke nos ta pasando aden actualmente pa causa di e brote aki di e pandemia, despues di e celebracion di Pasco y Fin di Aña, no ta wordo premira cambio prome cu dia 31 di januari.

E musico Ofo Escudero kende ta presidi e asociacion nobo Aruba Entertainment 2020 a bisa cu nan a reuni cu DCA y den nan reunion aki tambe a participa e doñonan di compania di zonido. Tambe tabatin representante di SMAC y tambe di MUSICA y AMA, caminda nan a entrega nan ideanan.

DCA ta encarga di pone e proposicion aki preto riba blanco cu posteriormente lo wordo manda pa Crisis Team (Gobierno). E hecho cu e biaha aki mas organisacion a participa den e reunion y proposicion aki, Escudero ta haya cu nan tin un base solido pa bin fuertemente como un grupo mas grandi.

 

E ta kere cu e unico aspecto positivo cu e crisis di e pandemia por a trece cune ta esun di por a bira mas consciente di organisa nan mes, y bin cu un asociacion nobo cu por sali na interes di tur partner envolvi den mundo di entretenimento.

Entrega di badge

Ayera nan a entrega e badgenan na nan miembronan. Nan ta personanan reconoci den e mundo musical of den farandula local manera Chicho Kock. Nan tin confiansa cu Aruba Entertainment 2020 lo sigui haya mas miembronan keto bay. Nan tin alrededor di 120 miembro. Escudero ta pensa cu despues cu nan a dal e prome step aki, e asociacion aki lo bay haya mas cu 200 miembro. “Esey ta e meta. Si nos ta yega 200, nos ta full bon,” el a bisa na e matutino aki.

Nan proceso di afiliacion ta wordo haci via digital. Nan ta manda un link na e musico, cantante, bailarina, Dj’s, etc… y nan ta yena tur informacion pa e asociacion tine den nan database. Cada persona, aunke ta forma parti di un agrupacion musical, mester wordo registra individualmente.

Igualmente el a laga sa cu den caso di un asociacion semper ta wordo pidi un contribucion of pago di miembresia. Pero den e caso aki, nan ta abstene di pidi e tipo di pago of contribucion aki, mirando e situacion cu nan tur ta pasando den dje.

Escudero a bisa cu nan ta haciendo e trabao aki di forma boluntario, y nan ta spera cu den futuro cercano cu tur cos ta bira bon, e ora ey nan lo evalua si lo pidi un contribucion di nan miembronan.

Nan a logra mas cu 120 miembro sin niun incentivo. E hecho cu awor nan miembronan ta haya un badge no solamente nan ta wordo identifica oficialmente como miembro di e asociacion aki. Sino cu nan lo haya descuentonan special den cierto establecimento comercial locual ta bira un beneficio y estimulo pa nan miembronan.