Gobierno Hulandes dialuna a bisa cu ta eliminando deuda cu e mayornan involura den un scandal di fraude ta debe na oficina di impuesto y otro departamentonan di gobierno, un scandal cu a causa cu gabinete a renuncia siman pasa.
Secretario di Estado pa Finanzas, Alexandra van Huffelen a bisa cu e decision ta nifica cu e miles di mayornan cu a ser acusa eroneamente di fraude pa e oficina di impuesto lo ricibi henter e pago di 30mil euro priminti na cada un di nan siman pasa.
“Mi ta kere cu e mayornan merece un comienso limpi di nobo pa nan por usa e compensacion pa en berdad haci un inicio nobo”, Van Huffelen a bisa den un declaracion.
Gobierno di prome minister Mark Rutte a renuncia diabierna pa motibo di un reporte parlamentario critico, titula ‘Inhusticia sin precedente’, cu a bisa cu politicanan di oficina di impuesto cu intencion pa combati fraude cu pago di asistencia social pa mayornan cu yiunan den crèche a viola ‘principionan fundamental di estado di derecho’.
Miles di mayornan tabata afecta durante varios aña y hopi di nan a cay den debe.
Van Huffelen a bisa cu e ta den combersacion cu organisacionnan priva manera banco y organisacionnan di vivienda pa nan tambe elimina cualkier debe di e mayornan afecta.
Maske gobierno di Rutte a renuncia, ta keda na poder den capacidad encarga (demisionario) te cu forma un coalicion gobernante despues di eleccion general programa pa dia 17 di maart proximo.
