Den luna di augustus, Open Democracy, un plataforma independiente di periodismo investigativo, a destaca e situacion di migrantenan Venezolano na Aruba, y con e procedura estricto pa asilo ta laga hopi di nan den miseria, rechasando nan derechonan humano pa asilo y refugio.

Segun UNHCR, e agencia di refugiado di Nacionnan Uni, Aruba actualmente tin mas refugiado y migrante Venezolano pa e poblacion local cu cualkier otro pais na mundo, cu 159 migrante pa cada mil habitante local.

Aruba historicamente semper tabata un lugar pa intercambio y comercio cu e continente Sur Americano. Tambe e tabata un destinacion faborito pa Venezolanonan prospero buscando trankilidad den hotelnan di luho, diversion den casino y relahacion riba beach di santo blanco. Piscado, bendedo di fruta y berdura, y traficadornan chikito tabata crusa tur dia for di Punto Fijo, e punto mas cercano na Venezuela continental. Pero awor tur esey a cambia.

E articulo di Open Democracy ta destaca e mansionnan luhoso na Aruba, cu ta duna trabao na un decena di migrante Venezolano cu status iregular. UNHCR ta bisa cu alrededor di 17mil Venezolano a yega Aruba pa mita di 2021. Hopi di nan ta traha den construccion of servicionan basico, y ta mantene un perfil abao pa miedo di accionnan di Guarda Nos Costa, cual ta inclui detencion y deportacion.

Alrededor di seis miyon Venezolano – un di seis parti di e poblacion di 30 miyon di e pais – a emigra den exterior den ultimo decada. Mayoria di e migracion aki a sucede desde 2017, segun un rapport publica luna pasa pa International Crisis Group, “impulsa pa agitacion politico, economico y social, y un crisis humanitario profundo”. Mayoria di nan a bay Colombia (casi 2.5 miyon) como tambe Brazil, Chile, Ecuador y Peru. E Venezolanonan cu a yega Aruba ta un cantidad relativamente chikito, pero e mesun dificultadnan politico y economico a impulsa nan igual cu tur otro.

Pa 2019, tempo di un crisis presidencial na Venezuela despues di disputa den eleccion, y aplicacion di mas sancion, e bishitantenan Venezolano rico na Aruba a keda reemplasa pa un fluho masal di turista Mericano y e dolarisacion virtual di e teritorio, segun Open Democracy. Riba algun di e cayanan conduciendo na hotelnan enorme, ta parce mas como Cancun of Miami cu e costanan di Venezuela.

Open Democracy ta mustra con ta un migrante Venezolano na Aruba no ta facil, door di trece dilanti e caso di Ronald Blanchard, un specialista di seguridad industrial y ex-residente di Coro, capital di Estado Falcon. Blanchard a traha pa varios aña den compania estatal Venezolano Pdvsa. Pdvsa a pasa den varios crisis di maneho, a termina den man militar, a sufri deterioro rapido, a experiencia welga y represion, y a retira miles di trahador den olanan sucesivo, algun di nan cu motivacion politico.

Na momento cu Blanchard a ricibi su retiro, el a habri su propio compania di servicio, pero e collapse di economia a causa e fracaso di e iniciativa. Despues di experimenta escasez insoportable y gran dificultad cu a menasa su famia, el a dicidi di emigra na fin di 2019. E frontera entre Venezuela y Aruba ya tabata cera e tempo ey, pues Blanchard a biaha na Colombia prome y despues a bula di Guajira na Aruba.

Mayoria di su compatriotanan migrante no tin e oportunidad of placa pa bula, sino mester yega na Aruba via lama – den otro palabra, riba un boto di traficadornan di hende. En teoria, esaki ta un crusada cortico cu ta dura apenas cuatro pa cinco ora, pero e ta plega cu peliger. E biahe por resulta mortal.

Politica hostil

E menasa di detencion y deportacion ta un realidad diario pa migrantenan ilegal na Aruba. Algun di esnan cu ta enfrenta persecucion politico na Venezuela ta purba aplica pa asilo, pero esaki ta wordo otorga aki aya pa autoridadnan. Y maske Aruba ta un pais independiente, gobierno na Den Haag ainda ta a cargo di politica exterior y seguridad.

Segun HIAS, e organisacion humanitario internacional cu ta duna servicionan vital na refugiado y solicitantenan di asilo na un cantidad di sitio rond mundo, mas di dosmil Venezolano a aplica pa asilo na Aruba na 2019, pero mayoria a wordo rechasa. Esaki ta laga nan den un situacion desespera, sin acceso na servicionan basico di salud of empleo legal, loke ta nifica cu nan ta forsa pa gana pan den mercado informal. Esnan cu ta ricibi asilo no ta haya un permiso di trabao tampoco, pero al menos nan no mester tin miedo di detencion of deportacion.

E determinacion pa bolbe cas, sea urgente of no, ta comparti pa mayoria di migrante Venezolano na Aruba, segun Blanchard a bisa Open Democracy. Algun, manera Blanchard, ta logra gana bon placa cual nan ta manda back pa nan famia, pero e condicionnan precario, miedo constante y imposibilidad virtual di obtene permiso di residencia y trabao ta decisivamente desalentador pa cualkier plan di biba riba e isla.

E soño di un ‘happy island’ a bira un pesadiya. Tin barera di tur sorto, incluyendo idioma: Papiamento ta e idioma local, Ingles e idioma di trabao, y Hulandes e idioma oficial administrativo – maske tambe ta papia Spaño ampliamente. E prioridad di e administracion – segun e articulo di Open Democracy – ta parce di ta pa disuadi Venezolanonan di nan soño pa inmigra na e paraiso aki, door di pone un muraya altisimo di burocracia nan dilanti.

Arubiano – y Hulandes – tin miedo pa relaha nan politica di migracion hostil pasobra menos cu 30 kilometer leu tin un pais cu sistematicamente ta expulsando su ciudadanonan. Cualkier noticia cu por genera un efecto di atraccion por duna impulso na un crisis di refugiado, cual sin duda lo destrui e balans fragil di un sistema economico basa riba santo, solo y lama di Caribe, y cu ta sigura su “180 km2 di felicidad – manera e propaganda oficial ta sigura.

Pero den e economia informal bao di hotelnan di luho, residencianan afluente y cruceronan gigante, Blanchard ta continua eherciendo su habilidadnan redescubri como carpinte den e sector di construccion local, cual ta haci bon uso di e forsa laboral Venezolano di gran habilidad, barata, y ilegal.

Si e no logra legalisa su situacion prome cu november, tempo cu e lo cumpli tres aña na Aruba, e ta determina pa bay back Venezuela.

Blanchard tambe ta un cantante amateur di llanera, musica folklorico Venezolano, den cual e ta hoga su nostalgia profundo pa su pais natal cu yen emocion. Compaña pa un cuatro, mirando e lama cu ta separ’e di su famia y amigo, e ta canta su cantica faborito: ““…para mal o para bien, a mí me tocó esta ruta, y qué le vamos a hacer, si hay que perder, aún no estoy resignado, déjenme seguir luchando, que mi deseo es vencer…”

1 COMMENT

LEAVE A REPLY

Please enter your comment!
Please enter your name here