Anselmo Ponitlius

Despues cu e trahadonan  di Kooyman a dicidi di a bay den accion diamars atardi, y cu gerencia di e negoshi aki y sindicato FTA no a logra yega na otro riba un punto so di nan contacto colectivo, ambos parti a pidi intermediacion di Gobierno.

Un punto so ta esun den discusion: Aumento di salario di un 2.5%. Mientras cu gerencia tin un sistema di evaluacion pa duna aumento di salario; FTA ta contra y nan ta prefera un aumento di salario structural pa tur trahado. 

Ayera tardi, sr. Anselmo Pontilius den su rol di Mediador di Gobierno a sinta cu ambos partido pa purba busca un solucion satisfactorio pa nan. Considerando cu e ta un CAO pa tres aña ta bon pa ambos partido analisa kico nan kier awor y kico ta pa futuro.

Intermediacion 

Antes cu e reunion a tuma luga entre ambos parti, sr. Pontilius a declara na Bon Dia Aruba su cu oficina a haya e peticion pa intermediacion diaranson ultimo.  Mediador di Gobierno sa cu FTA y gerencia di Kooyman tin un relacion entre sindicato y doño di trabou pa hopi aña. Ya caba nan a yega di firma varios contacto colectivo caba. 

Mirando e situacion cu a surgi Mediador di Gobierno a invita mesora ambos partido cu nan abogadonan pa busca un alternativa riba e punto cu nan a pega riba dje. Sr. Pontilius ta sali fei di punto di bista cu mester tin salida pa motibo cu ta un punto so esun cu a bira e piedra den sapato den e negociacion aki.

E ta haya cu semper e problema di aumento di salario ta keda un discusion den negociacion di CAO. Mediador di Gobierno lo brinda un of otro alternativa despues di nan reunion di ayera tardi. 

E tipo di negoshi aki ta un sector den cual tin bastante competencia. Aña pasa Mediador di Gobierno a sinta tambe na mesa cu sindicato STA y Wema, y esaki a permiti pa sr. Pontilius por tin un bista di loke ta come y bebe den e sector aki. Aunke den e caso specifico di Kooyman, sr. Pontilius no tin un bista riba con e cifranan ta hinca den otro.

Loke Mediador di Gobierno lo trata den prome luga ta pa ambos partido por acepta bek, loke nan a acepta of rechasa, y mira ey aden si nan por sali di nan impasse. 

Si nan no por sali di e impasse aki, Mediador di Gobierno mes lo presenta un alternativa cu di un banda FTA lo por a presenta y acepta cerca e trahadonan; y di otro banda gerencia lo por a mira si e por haya aprobacion interno di e compania. Ayera tardi fei 2’or te banda di 5’or y mey, ainda nan tabata den reunion.   

LEAVE A REPLY

Please enter your comment!
Please enter your name here