Caracas – Pa 12:30am dialuna, e Consejo Nacional Electoral a informa e pais di Venezuela e resultado di e eleccionnan cu a tuma luga diadomingo 6 december, cual a saca un gobierno nobo.E oposicion a gana eleccion parlamentario na Venezuela, y contrario na un declaracion anterior, presidente Nicolas Maduro a acepta e derota, culpando cu e guera economico a gana e eleccion. Cu e resultado final, 99 asiento vs 46 asiento, esaki ta suficiente pa e victoria pa e oposicion. Cu asientonan pendiente, e resultado por yega na 113 asiento.
RESULTADO INICIAL
Mas prome den anochi, nos colaborador na NoticiaCla a informa, den forma di primicia, cu mientras cu oficialmente e resultado oficial no tabata conoci y presenta ainda, pa secretaria general di Conseho Nacional Electoral (CNE) Tibisay Lucena, inoficialmente, e resultado di e eleccion parlamentario (Asamblea Nacional) di Venezuela tabata mustra di a bay pa oposicion. ‘Casa’ di e politico deteni Leopoldo Lopez, a manda un mensahe tambe confirmando cu oposicion a gana, mientras cu e secretario ehecutivo di e ‘mesa’ di Unidad Democratico MUD Rubén Pérez Silva, den estado di Carabobo, ta mustra cu e resultado ta uno di mayoria contundente. Informacion cu ta papia di te hasta 113 diputado (mester di 86 pa tin e mayoria minimo) di e 167.
Segun Pérez Silva, no tabata spera e resultado final oficial, sino te despues di mei anochi di dialuna. “Te ora cu no duna e informacion cu e resultado ta ireversibel, no por papia di un resultado oficial,” Pérez Silva a bisa NoticiaCla. E no tabata cla pa oficialmente declara e victoria pa oposicion, pero tur cos segun Silva, ta cu nan a gana un victoria convincente.
