Oposicion a cumpli cu “plantón nacional” contra Maduro

Oposicion di Venezuela a participa den un protesta nobo cu nan a yama “plantón”: cu tabata consisti di lanta un blokeo dilanti di tur caminda y avenida importante di henter pais, y asina mantene presion contra presidente Nicolas Maduro, cu mientras tanto a comunica su intencion di organisa un proceso di eleccion.

Caracas tabata bao un solo hopi fuerte, pero asina mes tabatin miles di opositor cu a bay Altamira, na este di Caracas, pa participa den e protesta. Nan a cambia funcion di e avenida ey, y el a bira un lugar pa hunga domino y carta, lesa buki, trece cuminda pa un picknick y bay riba suelo pa descansa, protegi cu bandera y parasol.

E protesta contra gobierno a dura 4 ora, y a keda un tiki afecta pa un bringamento chikito cu a tuma lugar na un sector di Altamira, entre algun grupo di manifestante. Den pleito a participa un hoben cu cara tapa cu tela, cu tabata lansa piedra y otro obheto contra polis. E grupo di uniforma a responde e manifestantenan cu bom lacrimogeno, pa asina purba di separa nan. Dialuna mainta gruponan di oposicion a sali riba caya atrobe pa asina protesta contra Maduro. E presidente di Venezuela ta acusa hende di oposicion di purba di logra un golpi di estado contra su gobierno.

“Nos kier biba liber, nos kier sali y sinta riba caya” Juan Carlos Bautista, comerciante di 48 aña a splica , mientras cu e tabata hunga domino cu otro cinco persona cu tabata sinta riba caminda. “Mi ta akinan pa lucha pa mi yiunan y pa e futuro di e yiu di mi yiunan,” el a bisa. Bautista a splica tambe cu e lo bay sinta riba caya e tempo necesario pa asina protesta contra gobierno. “Mi no ta worry pa e solo y calor. Nos tin cos pio. Pio ta ora cu bo ta wak un tata cu ta muri di hamber. Pio pa mi ta mira mi bisiña cu no tin medicina pa su yiu cu cancer,” Julieta Carvallo, maestra di 62 aña a opina. E tabata sinta riba suelo y mientras tanto tabata skirbi mensahe contra Maduro riba caminda, manera “bay, nos no kier boso mas y Venezuela no merece esaki”.

E marcha a cuminsa algun tempo despues cu nan a informa oficialmente tocante fayecimento di un muhe cu a haya golpi den un marcha di simpatisante di gobierno. E muhe tabata trahado di un hospital priva. Awor e cantidad di morto a subi te 21 den ultimo tres siman na Venezuela. Almelina Carrillo, di 47 aña a muri na un hospital den centro di Caracas, caminda el a drenta dia 19 di april, despues cu a el haya un golpi na su cabes, cu un boter di awa congela cu algun hende a lansa desde un edificio, Nestor Reverol, ministro di relacion interior a skirbi riba su cuenta di Twitter. Como medida di rechaso pa e protesta nobo, presidente Maduro a bisa diadomingo “cu e no ta bay entrega dilanti di forsanan di oligarkia.” Maduro a yama na tur su enemigonan pa bay den un proceso di dialogo cu ta paralisa desde december. E proceso di eleccion di alcalde mester celebra e aña aki y e eleccion di presidente ta programa pa aña 2018. Oposicion ta solicita un adelanto, pero gobierno a bisa no caba. “Mi ta cla pa asumi e decision di poder electoral,” Maduro a bisa.

“Mi ta solicita Papa Francisco desde aki, cu Papa Francisco por sigui acompaña nos den e dialogo, pasobra tin un conspiracion desde Roma y na Venezuela contra dialogo” Maduro a declara. Siete di cada 10 Venezolano ta rechasa e gobierno di Maduro cu tin e pueblo Venezolano den un crisis economico y con un scarcedad di cuminda y medicina y un inflacion cu ta considera e inflacion mas halto di henter mundo.

You May Also Like

OM ta actua contra spijbel na St. Eustatius

Fiscal di e islanan di BES a papia cu e alumnonan y mayornan di ...

No tin poscuido pa hende cu sentencia TBS na Corsou

WILLEMSTAD – J.L. cu tin sentencia di TBS despues di un aña den Foba, ...

Varios herido despues di atake y represion di Guardia Nacional na Caracas

E represion di guardia nacional bolivariano contra manifestacion pacifico di oposicion di ayera 3 ...

Mercosur a invita Venezuela pa garantisa ‘separacion di podernan’

E grupo di pais miembro di Mercosur a exhorta Venezuela pa garantisa e separacion ...

Drone arma manera un bom, ta e tecnica nobo di grupo narco na Mexico

Na momento cu polis federal di Mexico a detene cuatro homber cu tabata core ...

Venezuela: Investigacion contra Guaido pa sabotahe di coriente

E fiscal general nombra pa e asamblea constituyente Chavista, Tarek William Saab, a informa ...