Despues di conferencia di prensa di minister di Interior y di Asunto di Reino, Raymond Knops, pafo di VNO tabatin un grupo di oposicion wardando pa haci entrega di algun documento na e minister. Vocero di fraccion AVP, Melvin Tromp a representa e grupo.

E documentonan ta relaciona cu acusacion di oposicion cu minister president, Evelyn Wever-Croes ta enrikeciendo su mes cu placa di gobierno a traves di e bufete di su tata, Hendrick Seferino Croes. Tur e documentonan en cuestion ya a ser entrega na Ministerio Publico pa atende e asunto aki di Wever-Croes. E documentonan ta inclui factura di pago efectua na dicho bufete, di cual ministerio di Wever-Croes so ta haci uso.

Sinembargo, Tromp a declara na Bon Dia Aruba cu e kier a haci entrega di e documentonan na Knops tambe, pa asina bati alarma riba e asunto. “Nos ta haya hopi importante cu no solamente Ministerio Publico, cu ta un cuerpo riba su mes dentro di ‘trias politica’, pero nos ta convenci cu e gobernantenan Hulandes, den nos concepto, no ta na altura di loke ta pasando na e momentonan aki, y door di esey nos a haya na su luga pa entrega e documentonan aki na Knops. Pa e por, por lo menos pone su mes al tanto di loke ta pasando, y e forma con e actonan coruptivo ta tumando luga, di forma cu bo ta facilita placa di pueblo pa un solo famia. Esey ta locual nos ta bringando contra.”

“Tur prueba ta mara na e acusacion. P’esey mi ta sorprendi cu Wever-Croes ta bisa cu ami lo ta comete calumnia contra dje. Mi no por comete calumnia contra dje si mi tin tur factura con bo ta manda placa directamente pa bufete di bo tata… esey ta locual nos ta yama enrikecimento personal.”

Knops a sali pa topa cu e personanan aki y a ricibi e documentonan en cuestion, bisando: “Mi ta ricibi nan pasobra mi ta ricibi tur persona, asina mi a wordo lanta.” Knops no a bisa cu lo tuma ningun accion pa cu e documentonan, pero manera Tromp a declara, e unico meta pa cual a entrega esakinan tabata pa informa e mandatario.

LEAVE A REPLY

Please enter your comment!
Please enter your name here