Pa evita e discusion cu a surgi debi cu e plachi di auto te luna di maart lo wordo entrega, gobierno a dicidi di extende e fecha di pago di belasting pa number di auto. Esaki apesar cu departamento di Impuesto a informa cu e fecha di pago te dia 31 di januari -manera ley mes ta prescribi- no lo wordo extende mas.

Sinembargo minister di Finansa, Xiomara Maduro, kende ta encarga cu e departamento di Impuesto a informa cu e ultimo fecha di pago di number di auto lo bira 28 di februari 2020. E ta e fecha limite pa paga, ya sea full aña of mita di aña 2020, riba belasting di vehiculo di motor.

E ta haya cu e plaso ta largo suficiente pa tur hende por acumula e placa cu ta necesario pa cumpli cu nan compromiso di belasting pa vehiculo di motor. Te aworaki 13 mil ciudadano a paga debidamente e impuesto aki.

Tardansa.
Minister Ruiz-Maduro tabata mas habri pa revela cu e tardansa aki ta debi cu nan a haci e pedido di e plachinan laat. Pa motibo cu e no tabata hinca debidamente den e presupuesto. Nan mester a pidi placa extra pa departamento di Impuesto por atende cu e trabou cu nan ta haci riba e belasting aki.

Tur esaki segun e mandatario ta debi na e presion cu ta existi actualmente riba e situacion financiero y tambe di supervision riba tereno fiscal di pais Aruba, ta pone cu gobierno tin cu corta riba e presupuesto.

“Den e operacion ey di corta tin biaha bo ta corta den cierto gastonan, caminda ora cu bo a bay mira, bo tin hala placa di un pochi pa otro pochi…” segun e mandatario.

E mandatario a declara cu finalmente tur cos a wordo resolvi, y ya caba e plachinan ta den container pa wordo manda pa Aruba. Nan mester yega na luna di februari, y nan lo wordo entrega na luna di maart.

E mandatario a declara cu e ta compronde e discusion cu a bini despues di e anuncio cu lo wordo entrega na luna di maart, ya cu e ta laat. Pero nos mester ta sincero cu nos mes ya cu for di 2015 pa 2018, ta un plachi di number tabatin. “Tur hende tabata core cu blauw y nos no a tende zundramento…,” el a bisa.

LEAVE A REPLY

Please enter your comment!
Please enter your name here