Conferencia Episcopal Panameño (CEP) tabata obliga di duna un aclaracion relaciona cu e ‘doloroso y scandaloso acontecimentonan den cual sacerdotenan tabata involucra’. Ta trata di tres sacerdote cu a keda suspendi di nan responsabilidadnan pa ‘conducta inapropia y scandaloso’ pa Arquidiocesis di Panama. Arzobispo Jose Domingo Ulloa a declara cu a inicia un investigacion interno.
Esaki despues cu a bira conoci cu e sacerdotenan Rogelio Topin, Orlando Rivera y Karl Madrid a ser menciona den e denuncia di un hoben Venezolano den un video riba rednan social, unda el a conserva su anonimidad. E migrante Venezolano, cu den e video a duna su mes e pseudonimo ‘Cristian’ a conta con el a yega na duna “fabornan sexual” a cambio di placa, na cual el a accede pa su situacion economico. E kier keda anonimo pasobra e tin un esposa na estado y un yiu chikito.
Inicialmente a contrata e hoben pa haci diferente trabao pa un misa, entreo otro di ‘handyman’ y despues un di e sacerdotenan a acerca su persona cu e oferta di servicio sexual contra pago. Despues e circulo di sacerdote ‘cliente’ a aumenta.
Di nan banda e Arquidiocesis a indica cu no tabatin notificacion di existencia di un acusacion contra e sacerdotenan. Conferencia Episcopal den un comunicado a declara cu ‘Iglesia catolico a perdura pa mas di dos mil aña, y lo perdura, a pesar di e fragilidad di su miembronan, pasobra e ta un proyecto di Dios’. Den e comunicado tambe ta haci un yamado na e fielnan, en vista di e scandal, pa involucra den oracion.
