Panorama politico complica… Y di rumbo…?

Loke algun tempo atras tabata mustra ainda como un paisahe manehable pa gobierno di coalicion, den ultimo lunanan rapidamente a bira un campo di bataya cu varios obstaculo di tamaño respetable. Den e dianan aki nos ta mira un tras di otro ta aparece e problemanan di maneho financiero, e tratamento di e ley controversial di Serlimar, e problemanan multiple na Hospital, e diferencianan di opinion cu sector priva pa loke ta e cambionan alrededor di BBO y reforma fiscal, di cual nos no sa ki rumbo e ta bay tuma, mientras cu nos tin e leve impresion cu gobierno tampoco sa… Y asina nos por sigui cu un lista largo di asunto cu gobierno lo mester resolve. Den e situacion poco envidiable aki lo ta importante pa actua cu diligencia, prome cu cierto di e problemanan aki bira mas dificil ainda pa maneha.

Un di e temanan principal pa atende na e momento aki ta keda finanzas publico. Y aki e panorama ta cambia casi di dia pa dia. Diabierna pasa tabatin algo di hubilo cerca gobierno pasobra supuestamente no tabatin ningun KB den e reunion di Conseho di Ministro di Reino.Inmediatamente secretario di estado Knops a bin daña fiesta cu su entrevista unda el a bisa bon cla cu e asunto no a termina por lo pronto, y cu ta spera cu pa dia 18 di october si Aruba por duna un claridad ta kico nan ta bay haci pa hinca e protocol den ley. Dos dia pasa e otro asunto cu Hulanda kier pa Aruba atende, e maneho di finanzas pa aña 2019, a haya su continuacion cu e carta di CAft, cu ta anuncia cu nan a deposita un recomendacion cerca gobierno di Reino pa tuma paso contra gobierno di Aruba cu un instruccion (aanwijzing) pa coregi cierto asunto den implementacion di presupuesto 2019.

Por bisa cu practicamente nos ta ‘back to square one’ den e asunto aki. Y mientras tanto tempo ta cuminsa preta pa presupuesto 2020, unda atrobe Aruba lo por usa algo di bon voluntad di banda di Hulanda. Sin embargo, nos ta mira cu e situacion por escala rapidamente, si sano huicio no prevalece. Un punto fastioso cu di banda di Hulanda ta keda trece dilanti ta e gastonan di personal, unda ta critica gobierno di Aruba cu no ta mira avance den direccion di mehoracion structural den maneho di personal. Nan tin razon? Aparentemente si, den sentido cu den casi dos aña no a mira mucho iniciativa pa reduci e aparato publico, al contrario. Mirando e aumento automatico di gastonan di salario, e par di medida manera VUT realmente no ta cambia nada, ademas di e empleo di personal nobo, entre otro pa e Plan di Crisis Social. Por ta cu aki tin un diferencia di ‘cultura’ den manera di maneha e asuntonan aki? Sigur cu si; na Hulanda nan ta anda hopi mas ‘zakelijk’ cu esakinan: ora gobierno tin hende di mas, nan ta manda hende cas. Cerca nos hopi hende ta opone esaki, loke ta nan bon derecho, pero ken ta preocupa pa e hendenan local cu ta perde trabao den sector priva, despues di añanan di abuso unda practicamente no tin ningun proteccion di banda di e instancianan cu mester haci esey? En todo caso, hasta si nos no ta aplica ‘metodo Hulandes’ den esaki, mester realisa cu no haci nada tampoco ta un opcion, y ta esey lamentablemente nos ta observa awor.

Tin otro asunto cu a aparece di repente riba pantaya atrobe, y esey ta e refineria. Un di e companianan local cu tabata opera riba tereno di refineria a gana su caso den Corte y tin mas di 3 miyon florin pa cobra di Citgo. E pregunta ta si nan ta logra cobra e suma aki. Si esey resulta e caso, anto e ta duna un perspectiva menos positivo pa otro companianan cu tin pago pendiente di e proyecto fracasa aki. Pero e asunto aki ta trece nos tambe riba e relacion entre e compania Citgo y gobierno di Aruba. Aki ta keda bastante problema pa resolve. En principio e fracaso definitivo di e proyecto di rehabilitacion tin su banda positivo; nos ta haya otro perspectiva riba desaroyo di San Nicolas. Pero prome cu esey, nos tin varios obstaculo pa domina. Si acaso logra deshaci di e famoso contrato di 2000 pagina dentro di poco, ta surgi e pregunta ken mester percura pa desmantela e refineria. En principio Citgo, como e partner cu no a cumpli cu su obligacion, lo mester paga un suma di US$ 350. Pero e lo no ta algo cu nos por conta riba automaticamente. No ta sigur cu, si tin un gobierno nobo na Venezuela, cu nan ta bay asumi responsabilidad, ya cu e contrato firma dilanti Maduro nunca a haya ratificacion den Asamblea Nacional, loke segun nan constitucion ta obligatorio. Hasta China y Rusia a cuminsa tene cuenta cu e realidad huridico aki, si acaso mañan tin otro gobierno cu no ta asumi responsabilidad pa tur cos cu Maduro a haci y deshaci, desrespetando nan propio leynan. Ta ironico cu a produci un convenio di dos mil pagina, anto asina mes a logra ignora e realidad legal aki na e pais bisiña. Aki tambe ta desea tur hopi sabiduria.