Parlamentario Endy Croes ta splica cu diaranson durante ora di atardi parlamento yama un Openbare Bijeenkomst pa asina trata asunto den enseñanza. Parlamento tin diferente “tools” of metodo pa reuni. Un di nan ta den Vaste Commissie cual ya caba a tuma luga.

Tambe tin otro forma esta “Vragenuur” of “Openbare Bijeenkomst” unda den tur tres forma ta manda yama e minister concerni pa asina por bin splica of contesta si tin preguntanan of inkietud. Finalmente Parlamento tin e autoridad pa yama un OV esta un Openbare Vergadering cual ta bira un debate publico unda por presenta un of mas mocion y tambe por vota na final di un reunion asina.

Wega politico di fraccion di AVP
Minister Lampe a wordo yama pa oficialmente presenta na un Openbare Bijeenkomst. Mayoria maestro y maestra cu ta encontrando nan mes den un situacion cu posibel cambionan cu minister lo kier trece a acudi den sala di parlamento. Alabes sindicato SEPPA tambe tabata presente na dicho reunion.

Locual a hala atencion di henter Parlamento ta cu na inicio di e reunion Fraccion di AVP pa prome biaha e aña aki tabata completo esta tur 9 parlamentario di AVP tabata presente. Mesora esaki ta un señal cu AVP hunto cu algun hende lo a prepara un wega politico. Imagina bo pueblo, momento di trata hasta presupuesto di Pais Aruba nunca AVP ta completo. Mike de Meza y Benny Sevinger casi nunca no t’ey. Wel e biaha aki ambos tabata t’ey y Benny te hasta a “feita” despues di basta tempo. Manera a anticipa prome cu e reunion a inicia cu AVP t’ey no pa defende interes di e trahadonan preocupa pero mas bien pa haci wega politico.

Cambia setting di reunion
Na inicio di e reunion Marlon Sneek, lider di Fraccion di AVP a pidi un punt van orde pidiendo e presidente di parlamento pa cambia e “oproeping” di Bijeenkomst y haci esaki un OV esta Openbare Vergadering.

Nunca antes AVP ni ta completo na reunion y nunca spontaneamente asina no a pidi pa cambia e setting di un reunion. Pio ainda Marlon Sneek ni ningun otro Parlamentario di AVP no por a splica cu argumento pakico nan ta desea spontaneamente cambia e proposito di e reunion di un Openbare Bijeenkomst pa un Openbare Vergadering. Lider di Fraccion di MEP Rocco Tjon a splica corectamente cu minister t’ey pa contesta preguntanan y ta esey ta e meta di e reunion, esta pa minister contesta parlamento publicamente tur e preguntanan haci  pa asina por haya claridad. Corectamente semper despues por yama un Openbare Vergadering, esta un reunion publico pa asina debati ampliamente riba cualkier inkietud y fraccion di mep ta habri pa esaki si esaki bira un necesidad. Presidente di parlamento tambe a duna un splicacion y aclaracion alrespecto e tema aki.

Finalmente tabata hopi cla cu 9 parlamentario di AVP a bini solamente cu intencion di hunga un wega y politica di “shishi”. Parlamentario Endy Croes ta splica cu e tambe ta preocupa y tin atencion pa e preocupacionnan di maestronan y lo sa di atende esaki na e miho manera posibel den tur trankilidad y cu tur seriedad. Lo scucha ambos banda, tanto e maneho di minister como e preocupacionnan di e maestronan y mas cu claro mester por yega na un salida elegante salvaguardiando interes di tur sin perhudica e trahadonan.

 

LEAVE A REPLY

Please enter your comment!
Please enter your name here