Recientemente RCA a gana Nacional 1 – 0 y ta bira campeon di futbol Division di Honor 2018 – 2019,cu gol anota den e segundo tempo, RCA ta logra bira campeon di Aruba.
Despues di a perde e prome wega, gana e di dos, e ekipo Tricolor a lucha cu alma y cuerpo pa pone un otro strea riba nan bandera. Tabata prome biaha cu un ekipo ta gana nan ultimo dos weganan despues di e perde e prome.
Mester bisa cu e dominio di RCA den e prome tempo tabata bisto cu un miho toke di bala. Nacional no por a drenta nan wega y a keda hunga e balanan largo cu no tur ora ta yega e destino final. Nacional Soccer Club Aruba tabata falta e “hamber” cu nan a mustra den e prome wega. E hungadonan tabata pasivo y no a bay den duelo manera custumber.
Na final di e wega entre RCA y Nacional, Arubaanse Voetbal Bond – AVB ta anuncia e MVP di e play-off final entre e dos ekiponan finalista. Aki e bolante di RCA, Stiven Melchor a keda eligi como e MVP.
E hoben Melchor sin duda tabata e pieza clave di RCA den e dos victorianan den e final contra di Nacional. Un hungado cu a cubri masha hopi tereno y a duna e parti ofensiva un boost enorme. E adkicion di Melchor(cu ta studia na Republica Dominicana) pa cu e play-off tabata un bon decision di e organisacion tricolor.
Despues di e wega, AVB den presencia di minister di Deporte, Dangui Oduber a haci entrega di e respectivo premionan na e respectivo ekiponan ganado.
