Parlamentario Mervin Wyatt-Ras (AVP): ‘Aprobacion di e fondo lo yuda nos hendenan den e tempo dificil di crisis’

ORANJESTAD – Parlamento a trata e plan crisis social y e presupuesto pa esaki, pero Fraccion di AVP a trece diferente punto padilanti. Na prome luga ta importante pa duna sosten na e sector social.

Parlamentario di fraccion di AVP, Mervin Wyatt-Ras a trece padilanti cu sector social no a nace ora cu e gobierno aki a bin na mando, pero e tabata un proceso. Wyatt-Ras cu a traha den e sector social a experencia desaroyo den area social como un continuum.

Riba e plan di presupuesto social Raad van Advies tabatin diferente remarca por ehempel dicon tin un transferencia di e placa di 2018 p’e fondo. Raad van Advies a bisa dicon no por cuminsa laga e fondo existi entrante aña 2019. Tambe Raad van Advies a expresa preocupacion pa control y transparencia di e fondo. Manera Fraccion di AVP ta haci diferente pregunta na varios ocasion, Raad van Advies tambe a haci mesun preguntanan. Raad van Advies tambe, mescos cu AVP, a cuestiona e palabra crisis. Paso ora bo papia di crisis cu ta encera un ‘Noodsituatie’ tin cu bin cu plan de inmediato, no manera ta e caso awor, cu no a tuma luga niun acogida di crisis of ‘crisisopvang’.

E plan ta trece padilanti cu gobierno kier bin cu un acogida permanente, di un duracion largo. Esaki ta nifica cu no ta solamente di crisis ta papia, pero mester bin claridad tambe kico en berdad ta crisis, y pakico ta e acogida durante duracion largo. Ta importante tambe pa no solamente gobierno bay aloca tur fondo pa emplea diferente profesional, pero e parlamentario a enfatisa cu e cooperacion ta importante. Por tin hopi hende ta traha, pero mester mira un manera con e cooperacion aki ta bira estrecho y cu e mucha central. Na momento cu un mucha ta cay ‘tussen wal en schip’ e ora ta importante cu ta yuda e mucha. Tur esaki ta ‘bottle necks’ cu tin cu wak con pa yega na solucion. Den tur esaki e mucha mester ta central.

Tin un meld punt desde aña 2004, unda cu ta registra casonan. Por constata cu casonan a subi durante e ultimo aña aunke a emplea mas hende. Parlamentario Wyatt-Ras a expresa cu na momento cu cuminsa registra, mas hende ta meld y ta señala mas y mas caso. Mas duna informacion, mas siña profesionalnan pa meld mas casonan lo ser manda pa e bureau.

P’esey mes, no ta berdad caminda cu ta bisa cu e gobierno aki ta yega soluciona cos y no tabatin nada den pasado. Hopi ya cana a wordo haci den pasado y door di gobierno anterior y tin cu sigui door di e gobierno aki. Den parlamento tin miembro ta yama otro pa hipocrita ora cu ta critica. Sra. Wyatt-Ras no ta di acuerdo cu esaki, pasobra su rol ta eynan pa critica, hasta su propio gobierno. Wyatt-Ras no mester bay sinta den comisionnan pa asina ta na altura di ehecucion di e plan. Su trabou parlamentario ta si scucha y cuestiona si gobierno ta cumpli. Antes diferente instancia y stakeholder tabata presenta na parlamento pa duna nan informacion y expresa inkietud. E programa Stop Awor a ser presenta na parlamento door di stakeholders. Sigur ora di ehecuta e plan social aki, lo bin inkietud, y e posibilidad mester t’ey cu parlamentarionan por scucha nan. Wyatt-Ras ta garantisa cu e t’ey pa scucha y lo keda boga pa e sector social y miho bida pa nos hendenan, en special esunnan vulnerabel y esunnan den dificultad. P’esey mes Wyatt-, a pesar cu e no ta aproba e palabra crisis, a aproba sosten e fondo cu lo ser crea pa atende cu e area social. Un cantidad ta pa proyectonan cu AVP a entama y cu lo mester continua.

P’esey mes, fraccion di AVP a entrega un amienda pa evalua ehecucion di e fondo cada kwartaal, cual amienda a ricibi sosten unanime, y asina tambe fraccion a duna sosten na e fondo cu a ser aproba na un forma unanime.

You May Also Like

PDR: 1 partido 2 bestuur

ORANJESTAD – Pa exactamente 3’or di atardi, e grupo cu ta bisa di tin ...

‘Politiconan mester stop cu engañonan populista pa gana voto’

For di algun tempo caba partido MAS a tuma nota di varios engaño populista ...

Richard Arends no por bisa si lo ta dispuesto pa lidera AVP of no

For di siman pasa a cuminsa circula varios rumor cu Richard Arends lo bira ...

‘Persecucion politico lo demotiva hobennan studiante specialisando nan mes

Parlamentario pa fraccion di AVP, Michael Lampe a mustra riba un situacion sumamente preocupante ...