Partido MEP: ‘AVP dispuesto pa para riba nan cabes en bes di acepta responsabilidad’

ORANJESTAD – Aruba mester a soporta e fracaso financiero di gobernacion di ex-Gabinete Mike Eman I y II, unda pais Aruba a ser endeuda te na borde di bancarota, hibando e debe te riba 90% di GDP.

Gabinete Mike Eman a aumenta nos debe nacional for di 2.2 biyon florin na 2009 te na 4.2 biyon florin na 2017. Esaki a ser rechasa door di pueblo durante eleccion 2017, te cu e lider di e partido a bay sconde den su penthouse pa no enfrenta y asumi su responsabilidad.

Ironia di bida ta cu awor cu e autornan di e fracaso aki ta den parlamento, ainda nan tin e pudor di bin haci manera cu nan no a kibra un copi. E gobierno di AVP a demostra di no tin ningun consideracion ni piedad di pueblo, endeudando te hasta e proximo 3 generacionnan di Arubiano, cu mester bay paga e desastre financiero cu nan a comete den e periodo di 2009 pa 2017.

Por a tuma nota di tur sorto di maniobra di parti di partido AVP, cu awor ta pretende di tin tur solucion, y ademas ta sigui purba manipula pueblo, como si fuera riba e isla aki tin hende kens ta biba. Tambe nan ta sigui uza nan influencia aki na Aruba y na Hulanda, pa di tur forma dificulta e trabou sobrehumano cu e gobierno nobo ta desplegando pa atende cu e consecuencianan di e desastre financiero cu e partido AVP a laga atras.

Bo tin parlamentario Arthur Dowers, cu awe kier bin punta dede ariba gobierno cu acusacionnan sin base, pero sr. Dowers ta sufri di amnesia selectivo y ta lubida con e mes a sconde pa añanan e realidad di criminalidad den nos comunidad. E gañamento aki a continua te cu criminalidad a bira asina alarmante, cu te hasta asesinatonan a cuminsa cay, y sr. Dowers no por a sconde e amargo realidad mas.

Bo tin parlamentario Mervin Wyatt Ras, cu ta tira piedra sconde man. Despues di a participa y a apoya Gabinete Mike Eman I y II den e atraco di nos pueblo, awe kier pretende di ta preocupa cu bienestar di esunnan mas vulnerabel den nos comunidad. Sra. Wyatt Ras, diripiente ta sufri di perdida di memoria, pasobra e mes a yuda corta sin piedad den presupuesto y subsidionan di e departamentonan cu mester brinda apoyo social. Sra. Wyatt Ras a yuda sconde rapportnan cu tabata mustra riba e crisis social cu tabata escalando, y a para un banda mira con su minister tabata worry mas cu firma ontzeggingen, cu worry cu esunnan cu tabata sclama pa alivio social.

E comportacion aki ta un prueba mas cu partido AVP y su integrantenan no ta arepenti di nan actonan, y mas bien ta sigui den cu nan mes modus operandi pa purba tira culpa ariba otronan. Ta sigui cu manipulacion y engaño, cu e unico meta ta pa sigui satisface nan furia pa placa y poder. E maneho cruel cu pueblo a haya durante e gobernacion di ex-Gabinete Mike Eman I y II no lo ripiti mas.

You May Also Like

‘Wardando ley di prohibicion di plastic, oxybenzone y styrofoam yega parlamento’

Parlamentario Daphne Lejuez (MEP) Manera conoci, gobierno di Aruba recientemente a anuncia cu entrante ...

‘Pregunta haci na prome minister riba contrabanda di oro di Venezuela’

Parlamentario di fraccion di AVP, Robert Candelaria a mustra cu ya pa algun tempo ...

Tension di Partido Democracia Real ta keda existi

Durante e siman aki Bon Dia a trece dilanti e noticia cu caso di ...

Carlos Bermudez ta subi lista di AVP

Diasabra anochi  a tuma luga e lansamento di candidato Carlos Bermudez cu ta subi ...