Diaranson ultimo tabatin un encuentro publico, unda cu a purba di haya aclaracion riba e desaroyonan di SPO (Scol Pa Ofishi) y Traimerdia. Cu mester bin cambio no tin duda, pa asina eleva nos enseñansa, pero tambe ta bon pa tin aclaracion y transparencia pa evita mal comprondemento, incertidumbre y inkietud cerca e docentenan, e alumnonan y e mayornan.

“Nos ta fin di aña escolar y p’esey mes ami y henter parlamento a haci un peticion elegantemente na minister Lampe, pa para e cosnan un rato, bay bek mesa y dialoga cu tur stakeholders y asina yega na un miho plan di implementacion pa e cambionan, unda principalmente e muchanan no ta sali perhudica”, parlamentario Sue-Ann Ras a cuminsa na bisa.

Carta 21 juni 2019
E carta cu a sali dia 21 di juni 2019 sigur a bolbe trece inkietud y incertidumbre den veld di enseñansa. Minister Lampe ta indica den e carta (carta adhunto):

1. Pa e aña escolar 2019-2020 tur e alumnonan nobo pa klas 1 di SPO, lo bay na e localidad di Brasil, pa sigui e curiculo nobo estableci, unda tin infrastructura nobo ideal. E alumnonan di klas 2 y klas 3 di SPO Santa Cruz lo sigui nan estudio na e localidad na Santa Cruz cu e sistema bieu di enseñansa.

2. E metanan di curiculo nobo ta duna e mucha e espacio pa haci un trayecto individual pe crece segun su potencial. Pues e evaluacion no ta den forma di cifra mas, sino den e logica di e metanan, unda ta exclui e parti di keda sinta.

3. No lo habri solicitud pa e localidad di SPO Santa Cruz, ya cu lo nombra un coordinador, cu lo cay bou di e responsabilidad di directiva di SPO Brasil.

Documento
Segun Ras: “Mas cu claro, por compronde cu esaki niun momento mes a keda palabra den Parlamento diahuebs ultimo y mucho menos, si mi bay riba e documentonan cu minister mes a indica cu el a haci uzo di nan, pa crea e curiculo nobo, cual tabata e Adviesnota Praktijkonderwijs op Aruba, September 2017”.

1.  Den e documento “Adviesnota Praktijkonderwijs op Aruba, september 2017’ ta indica claramente cu ta papia di dos localidad di SPO na Aruba. E pregunta automaticamente cu e accion aki ta trece cune ta: Kico ta e intencion e ora cu SPO Santa Cruz, mirando cu ya caba ta manda tur e alumnonan nobo na Brasil y no lo tin solicitud pa e localidad di Santa Cruz?

2.  Den e mesun documento aki ta papia di un plan di implementacion elabora pa realisa e metanan. Unda esaki ta riba papel?

3. Pa formulacion di e maneho nobo, di cual Departamento di Enseñansa ta encarga pa enseñansa basico y secundario special, mester stipula e demas ley- y regulacionnan. Esakinan tampoco no a yega Parlamento ainda.

4. Den e documento Richtlijnen Onderwijsorganisatie SPO 2015-2016 articulo 10 ta poni cu e klasnan no por ta mas chikito cu 10 alumno y no mas grandi cu 12 alumno. Tin un cantidad di  alumno cu lo inicia awor, unda Minister mes a indica durante reunion, cu e klasnan lo bira 14/15 alumno. Esaki sigur ta trece preocupacion cerca e docentenan, ya cu e alumnonan aki  ta funciona miho, ora cu e cantidad ta menos y sin laga afo, cu e lokaalnan ta diseña pa e cantidad maximo di 12 alumno. Specialmente si e directora interino di DPS a bisa e docentenan cu nan mester ta creativo cu e espacio, aunke e lokaalnan ta chikito?

“Cu enseñansa na Aruba mester haya un shift, innovacion, elevacion, renobacion no tin duda. Nos no por keda haci e mesun cosnan y spera otro resultado. Pero den e mesun rosea di deseo di cambio abrupto, nos mester ta responsabel tambe. Nos mester haci e cambionan necesario a base di investigacion, dato, dialogo, teamwork, plan di ahustacion y implementacion structura,  bon argumenta y sostenibel, pa tur hende compronde y sinti confiansa pa join e movemento. Y asina hunto nos por haci e shift den un enseñansa mas exitoso y cu e oportunidadnan husto y igual pa tur mucha”, Ras a finalisa bisando.

 

LEAVE A REPLY

Please enter your comment!
Please enter your name here