Den e ultimo dianan nos por a ripara cu e cantidad di personanan cu ta wordo getest pa COVID19 ta aumentando agresivamente. A test 601 persona, segun e update cu Gobierno di Aruba a duna ayera. Esaki ta sigur algo sumamente positivo, pasobra mas persona ta pasa e test mas persona ta wordo detecta y por actua di manera oportuno.

E trabao cu tur e personanan envolvi den e proceso aki, ta haciendo sigur ta uno sublime, pasobra tanten cu hopi hende ta cas percurando pa nan ta safe y sigur, e personal di salud ta expone nan mes dia tras dia, pa e proceso di tumamento di muestra y analisis ta tuma luga.

Aruba ta un di e luganan na mundo unda, teniendo na cuenta e poblacion di e isla versus e cantidad de hende cu ta pasa e test, e porcentahe ta uno basta halto. Kiermen cu e obhetivo di un vigilancia epidemiologico di calidad cu por yuda orienta personal di salud pa tuma decision y medidanan eficaz di prevencion pa yuda e comunidad ta hopi bon. Sin embargo un vigilancia epidemiologico su obhetivo tambe ta pa elimina e risiconan di transmision di e virus den e caso aki.

Keho
Den e parti aki di elimina e risiconan a surgi diferente keho di e manera con e logistica na e Centro di Diagnostico ta wordo hiba. Pa di prome, e personanan mester para den rij pafo di e luga, y te hasta aglomeracion a wordo presenta, sin tene cuenta cu e dos meter leu for di otro, nan ta para den rij den e via publico, loke ta trece cune e falta di privacidad. Ademas e personanan aki kendenan ta potencialmente positivo, algun di nan ta sali di nan cas sin ningun sorto di proteccion personal. Nan ta yega para den rij sin un face mask ta tosa riba otro. E peliger pa mas persona resulta contagia ta bira mas grandi, specialmente pa esunnan cu no ta positivo cu ta para cerca pa wordo getest. Segun testimonio, e personal di centro di diagnostico ta ofrece pafo ken kier face mask, y tin hende cu ta nenga di bisti’e.

Centro di diagnostico

E preocupacion riba con e servicio aki ta wordo duna a ser atendi pa directora di departamento di Malesa Contagioso, Sharline Koolman y PR di DVG, Jurette Croes riba e centro diagnostico, unda tur test ta detecta Covid-19 ta wordo haci.

Nan ta duna 12 hende maximo 15 hende cita riba un ora specifico. Nan orario ta consisti di cuater biaha pa dia: 9:30am -11:30am – 2:30pm y 3:30pm. Nan a laga sa cu tur hende ta haya un afspraak pa un ora specifico, pero ta sosode cu nan ta yega mas trempan di e ora di e cita, dus nan no ta tene nan mes na e orario stipula. P’esey ta importante pa ‘cumpli cu e orario di e afspraak pa no para den un rij innecesariamente pafo,’ Koolman a bisa.

Enfasis ta wordo haci pa e persona presenta na e orario bisa pa e bin. Si e ta bin un ora prome of despues, e persona ta haya su mes confronta cu e mester warda pafo. Y esey ta e problema cu a wordo presenta.

Ayera PR di DVG a bisa cu berdaderamente esaki no ta leuk, pero esaki ta debi cu e persona no a bin na e ora stipula. Unabes cu e persona ta drenta paden -segun e orario stipula- e ta haya tur cos cu mester haya di proteccion y tambe informacion pa nan lesa. Nan tin capacidad pa 12 pa 15 hende, manteniendo un distancia. Ademas nan tin dos persona cu ta realisa e proceso administrativo y despues nan ta wordo getest y despues nan por bandona e luga.

 

LEAVE A REPLY

Please enter your comment!
Please enter your name here