Ex-general Oliver Alcala a keda entrega na autoridadnan Mericano y a biaha caba pa e pais aki diasabra pasa. Alcala a entrega su mes na autoridadnan Colombiano na Barranquilla, despues cu el a aparece riba e lista di (ex-)funcionario di e regimen di Nicolas Maduro pa cual husticia Mericano a pone recompensa pa informacion cu lo conduci na aresto di e personanan.

E lista di 15 persona, encabesa pa e propio Nicolas Maduro, cu a haya un recompensa di 15 miyon dollar riba su cabes, ta contene nomber di tur e figuranan principal di e actual top di e regimen, incluyendo Diosdado Cabello, presidente di Asamblea Constituyente Chavista, Maikel Moreno, presidente di Tribunal Supremo di Venezuela, y Vladimir Padrino Lopez, actual ministro di defensa.

Mientras tanto na Spaña a tuma lugar otro suceso relaciona, unda ex-general Hugo (Pollo) Carvajal a entrega su mes na autoridadnan hudicial di e pais y lo pasa pa mannan di husticia Mericano. Carvajal tabata di paradero desconoci desde november aña pasa, despues cu Audiencia Nacional (corte supremo Spaño) a aproba su extradicion, mientras e tabata den libertad na Spaña. Ta anticipa cu Carvajal lo keda entrega pronto na autoridadnan Mericano.

Cu e sucesonan aki, ya tin dos ex-confidente di Nicolas Maduro den man di husticia Mericano, cu por duna hopi informacion di e forma di opera di e regimen. Ambos a distancia nan mes enfaticamente di e regimen di Maduro, sin embargo esey no a kita e acusacionnan Mericano cu nan tabata envolvi den narcotrafico tempo cu nan tabata parti di e regimen ainda.

LEAVE A REPLY

Please enter your comment!
Please enter your name here