E campeonato 2016/2017 di Division di Honor di Arubaanse Voetbal Bond a inicia dia 30 di september 2016 den stadion Guillermo Prospero Trinidad. E prome wega tabata entre e campeon y sub campeon di Division di Honor 2015-2016, esta SV Dakota y SV RCA. SV RCA a gana e prome wega aki cu score di 3-0.

Di eynan a sigui e campeonato di cual a hunga mas o menos 80 wega, entre 10 ekipo di futbol, cu na caminda a bira 9, despues cu Jong Aruba a cay afo. Na final e standing a keda cu na di 9 luga La Fama, sigui pa Caravel, pa Bubali, pa Estrella, pa Riverplate y asina e 4 ekipo cu a pasa pe play-off a bira Deportivo Nacional na di 4 luga cu 27 punto, SV Dakota na di 3 luga cu 28 punto, SV Britannia na di 2 luga cu 32 punto y SV RCA na di prome luga cu 37 punto. E 4 ekipo aki lo bataya awor pa e trofeo di campeon y sub campeon den e liga di mas halto di Aruba, esta Division di Honor.

Diabierna12 di Mei pa 8’or y mey di anochi den stadion Guillermo Prospero Trinidad na Dakota e play-off ta inicia, unda cu e wega inicial di e prome rond lo ta entre SV Dakota contra SV Britannia. Diasabra anochi dia 13 di Mei, na stadion di Dakota lo ta e wega entre SV Nacional contra SV RCA y ta inicia pa 8’or di anochi. Diaranson dia 17 di Mei pa 8’or di anochi un biaha mas den Stadion Guillermo Prospero Trinidad na Dakota lo tin e wega entre SV Britannia y SV Nacional. Dia 18 di Mei lo tin e wega entre SV RCA y SV Dakota, tambe pa 8’or di anochi den Stadion Guillermo Prospero Trinidad.

AVB ta invita tur fanatico di e 4 ekipo batayando den e play-off final pa yega stadion y apoya nan team y hungadonan faborito. Tambe AVB ta invita henter Aruba pa bin stadion y presencia e weganan. Na porta lo haya e carchinan pa cumpra pa solamente 10 florin pa adulto y 3 florin pa mucha, pa cada wega. Laga e bala lora.

A funda Arubaanse Voetbal Bond na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur y profesional riba nos isla, incluyendo e muchanan, hoben, hende muhe y adultonan. E ta responsabel pa sanciona e refereenan y e torneonan di futbol organisa pa mayoria liga. Nan oficina ta situa den Compleho Deportivo Frans Figaroa na Noord.