Minister di Turismo, Dangui Oduber a duna un update riba e mega- proyecto di Port City Aruba. Gobierno ta bezig cu e proyecto aki pa duna otro destino na e waf di Playa, ora cu e actividad di container a muda pa Barcadera.

Oduber a declara na Bon Dia Aruba cu e proyecto di Port City ta un master plan di 20 aña. E tereno aki ta caminda e terminal ta caba, y unda conciertonan ta tuma luga te cu ex Bushiri hotel. Esaki ta e prome parti, ya cu a parti e tereno den dos. Pa e prome pida aki ya caba tin un plan diseña y te hasta cada parcela a wordo reparti. Mientras cu e di dos parti, gobierno tin un idea, pero te ainda no tin un decision final aproba den Conseho di Minister. Oduber ta kere cu prome cu nan ta tuma un decision, ta bon pa consulta e gremionan y comunidad riba kico nan kier mira riba e di dos parti di e tereno di APA.

Ta un proyecto cu ta rekeri un inversion di sector priva. El a menciona un inversion di 500 miyon dollar pa henter e desaroyo. Mientras Aruba Port Authority (APA) ta esun cu ta bay inverti den infrastructura, landscaping, mantencion di careteranan, etc. El a pone enfasis riba e punto aki, pasobra e ta haya cu ‘hopi biaha nos ta anuncia proyecto y bo ta haya e cuestionamento cu gobierno no tin placa, pero si ta bay inverti den un proyecto asina miyonario’.

El a splica cu e modelo ta cu e inversionistanan ta paga APA y APA ta paga gobierno pa e uzo di e tereno. Mientras cu e ingreso ta wordo inverti bek den infrastructura cu ta rekeri den e proyecto aki pa e añanan cu ta sigui.

Traspaso
E area aki a keda habri pa desaroyo y na momento aki – segun e mandatario di turismo, kende tambe ta encarga cu APA – nan ta den un proceso di negociacion cu su colega di infrastructura pa nan por yega riba e balor di prijs di e tereno aki. Te ainda no a informa oficialmente si esaki ya caba a wordo concretisa. Pero unabes cu nan ta yega na un entendimento, Ministerio di Infrastructura lo traspasa e tereno aki, cu ta di Pais Aruba, pa APA. Unabes cu esaki sosode, APA por cuminsa cu e proceso di destaho pa cuminsa cu e desaroyo comercial den e localidad aki.

Oduber a bisa cu nan atencion ta poni pa bin cu un desaroyo estilo boutique hotel. Nan lo purba tene e desaroyo chikito, pero di calidad hopi halto. “Esaki ta e maneho cu mi kier hiba como Minister di Turismo,” el a bisa. Segun e mandatario, nos tur ta consciente di e presion cu tin riba cada proyecto hotelero. P’esey nan a scoge den e proyecto pa desaroya Port City pa bin cu boutique hotel, el a bisa.

El a agrega cu den e proyecto aki nan a tene cuenta cu deseo di e comunidad. Den sentido cu nan kier mira hopi parke y areanan habri y cu nan por tin accesibilidad na dje. Den esaki nan a tene cuenta cu tur e comentarionan y opinion di comunidad den e reparticion di e area grandi y atractivo aki aunke tin un desaroyo comercial, considerando cu ta un tereno di hopi balor.

Pero na mesun momento tin area habri cu coffee house, restaurant, parke di recreacion, hardin botanico, etc. El a aclaria cu e intencion ta pa no bay competi cu centro di ciudad. Pa tal motibo nan kier bin cu e tipo di negoshi di cuminda y bebida pa crea un ambiente distinto cu Aruba no tin, segun e mandatario.

Tambe nan lo inverti den infrastructura pa complementa e proyecto di Port City. E area di ex Bushiri hotel, cu ta uno atractivo caminda tabatin hopi controversia si lo bin of no cu un proyecto hotelero, of si e area aki lo keda habri. E ta un area bunita, atractivo, ademas e tin un beach, pero e no ta den bon condicion. E mandatario a laga sa cu nan lo drecha e area aki, y crea un beach nobo pa comunidad, unda lo crea parkenan y tambe area di parkeer, pero tambe coffee house y restaurantnan. Nan lo embeyece full e area aki cu e fondonan di ATA.