Durante oranan di atardi pa anochi a cuminsa un polemica riba medio social di Facebook despues cu un potret di dos miembro di cuerpo policial a keda publica riba grupo popular ‘Vraag&Aanbod’. E persona cu a publica esaki a cuestiona si e polisnan lo haya boet, principalmente esun cu tabata sinta tras di stuur.
Tabata algun siman pasa cu Ministerio Publico (OM) a informa cu di awo pa dilanti bo por haya un boet di 500 florin pa tene telefon den man ora di stuur auto. Esaki ta un cambio di ley desde 3 di augustus, specificamente articulo 7a di Landsverordening Wegverkeer, cu ta bisa cu bo por haya un castigo maximal di detencion te cu tres luna of un multa di 10 mil florin pa e uzo di telefoon tras di stuur.
Apenas 1 dia despues cu e ley aki a keda introduci, e departamento di Motor Rijder di cuerpo policial a tene un control specificamente riba e articulo di ley aki. Esaki a produci un total di 19 procesverbaal di cual 8 a wordo duna parti mainta y e otro 11nan tabata atardi despues di 5’or.
Polemica
Parti di e discusion cu a surgi tabata si e polis defacto tabata maneha e vehiculo of si e tabata para un caminda. Notabel tabata cu basta personal di polis a sali na defensa di nan colega pero tambe un cantidad di ciudadano a indica cu bo por wak claramente cu e vehiculo no tabata ser maneha na momento cu a tuma e potret.
Un di e comentarionan cu nos a tuma nota di dje tabata bisa ‘ley pa un, ley pa tur’. Esaki ta algo cu sigur ta asina ya cu bou di ningun circunstancia, niun persona, sin importa su posicion, no ta para riba ley. Durante dia di awe Bon Dia Aruba lo ta tumando contacto cu cuerpo policial busca mas informacion di kico a pasa y con lo atende cu e situacion aki cu toch na un manera of otro ta pone e cuerpo bou di un luz negativo.
