E controversia rond di minister Gerlien Croes, ta sigui domina e debate politico, mientras cu parlamentarionan di oposicion, y hasta un miembro di coalicion, ta intensifica nan yamado pa mas transparencia tocante un biahe di trabao cu e mandatario a realisa den un jet priva. Durante e reunion publico di dialuna ultimo tocante otorgamento di contractnan di enseñansa sin un proceso di destaho, parlamentarionan di oposicion a bolbe haci preguntanan na e minister tocante e biahe en cuestion, cual e mandatario a dicidi pa no contesta.

Parlamentario di oposicion Xiomara Maduro a expresa atrobe preocupacion tocante e asunto, argumentando cu e minister ainda no a presenta prueba di pago pa e vuelo a pesar di lunas di cuestionamento publico y peticionnan repetitivo for di fraccion di oposicion. Maduro a bisa cu e asunto no ta solamente tocante e vuelo mes, sino tambe tocante responsabilidad, integridad y confiansa publico den liderazgo gubernamental.

Segun Maduro, minister Croes ta maneha cinco cartera ministerial, loke ta dun’e considerable poder den gobierno. Cu esey, e parlamentario a argumenta cu tin tambe un responsabilidad hopi grandi pa mustra transparencia na pueblo.

E debate ta centra riba un biahe cu minister Croes a haci pa Corsou den un jet priva den luna di november aña pasa. Fraccion di MEP repetidamente a cuestiona kende a paga pa e vuelo, cuanto a ser paga y si e areglo tabata conforme ley di integridad y reglanan di aviacion na Aruba.

E controversia a sigui crece y a bira un tema di atencion. Parlamentario Maduro a critica loke el a describi como un “patronchi peligroso” den reaccionnan di e minister, alegando cu atencion constantemente ta ser desvia for di e preguntanan principal cu ta ser haci.

Fraccion di MEP ta sostene cu e asunto por a ser resolvi rapidamente si documentacion cu comprobante di pago pa e vuelo a ser presenta na principio di e controversia. Maduro a enfatisa cu, e ausencia continuo di e documentacion ey ta precisamente loke ta mantene e controversia bibo.

Lider di fraccion di PPA, parlamentario Eduard Pieters, tambe a expresa su frustracion cu e falta di contesta di e mandatario. Durante un conferencia di prensa el a indica cu desde aña pasa nan ya tabata haci preguntanan tocante e biahe, pero cu te ainda no tin claridad.

Pieters a remarca cu awor a yega e punto cu no solamente oposicion a cuestiona e asunto, pero tambe un miembro di coalicion, parlamentario Mike de Meza, ken a pidi pa claridad riba e tema durante e ultimo reunion parlamentario.

E parlamentario di PPA a califica e situacion como “un berguensa”, argumentando cu tanto oposicion como miembro di coalicion no a logra obtene contesta directo for di e minister.

Segun e lider di fraccion di PPA, e comportamento di e minister ta representa no solamente un falta di respet na Parlamento, sino tambe na Constitucion di Aruba, cu el a describi como “e ley di mas halto di Aruba.”

El a subraya cu minister Croes conscientemente ta scoge pa no contesta preguntanan di Parlamento, algo cu segun e ta crea un conflicto directo cu e deber constitucional di un minister. “Minister ta dicidi structuralmente y conscientemente pa bay contra nos Constitucion y falta respet na nos Constitucion,” Pieters a afirma.

El a critica tambe e declaracionnan di e mandatario indicando cu e no ta contesta e preguntanan den Parlamento y cu e ta contestanan durante e caso cu algun parlamentario di oposicion a cuminsa den corte administrativo, LAR, contra e mandatario despues cu nan a haci uso di ley di LOB pa solicita documentacion oficial tocante e biahe.

Por ultimo, parlamentario Pieters a haci un yamado directo na e minister pa contesta e preguntanan y entrega e informacion solicita.

Fraccion di MEP ta entre e criticonan mas vocal den Parlamento. Durante e ultimo lunanan, parlamentarionan di oposicion manera Rocco Tjon, Dangui Oduber y Evelyn Wever-Croes tambe a cuestiona publicamente e maneho di e asunto.

Nan tambe a referi na e Landsverordening Openbaarheid van Bestuur (LOB), argumentando cu pueblo tin derecho di haya claridad tocante biahenan oficial di gobierno y gastonan relaciona cu nan. Segun e parlamentarionan di MEP, varios peticion formal pa informacion a ser entrega, pero contestanan cu nan a ricibi tabata incompleto of insuficiente.

Agregando na e controversia tin preguntanan tocante e avion mes. Segun e fraccion di oposicion a indica, e avion envolvi no tabatin un Air Operator Certificate (AOC) comercial, algo cu segun nan ta crea preguntanan adicional legal y etico tocante e areglo di pago pa e vuelo.

Fraccion di MEP a manda un carta pa SE Gobernador di Aruba buscando intervencion despues cu nan a alega cu esfuersonan di supervision parlamentario tabata ser obstrui.

Oposicion ta argumenta cu ministernan mester ser teni na e standard mas halto di transparencia, particularmente ora ta surgi preguntanan tocante beneficio, regalo of areglonan di biahe priva conecta cu cargo publico.

Di otro banda, parlamentarionan di coalicion a argumenta cu oposicion ta usando e controversia pa ganashi politico.

Minister Croes mes anteriormente a defende su accionnan y a nenga cu el a haci algo malo, insistiendo cu e biahe tabata relaciona cu trabao y cu critica di oposicion tabata politicamente motiva.

E controversia rond di e biahe cu jet priva ta keda un di e asuntonan politico mas sensitivo cu gobierno di Aruba ta enfrenta, mientras transparencia, integridad y responsabilidad publico ta sigui domina e combersacion nacional.

Tension den Parlamento a bira mas evidente na momento cu presidente di Parlamento a schors e reunion abruptamente te proximo aviso, un decision cu a provoca reaccion fuerte for di miembronan di oposicion, cu a alega cu el a haci esaki pa proteha e minister.

Mientras tanto e demanda pa claridad tocante e biahe di minister Gerlien Croes ta sigui crece tanto den politica como den comunidad.