Diabierna mainta, e comision di SDG di Aruba a presenta nan rapport anual pa aña 2018 durante e reunion di conseho di minister.

Presente na e reunion tawata Jocelyne Croes y Ghislaine Nicolas di comision di SDG Aruba, Desiree Helder y Marylou Lejuez di Oficina Central di Estadistica (CBS), Vivian Loopstok y Clarienne Croes di Departamento di Asuntonan Economico (Dezhi) y Ghisbert Boekhoudt di Directie Natuur en Milieu (DNM).

4 aña pasa, e asamblea general di Nacionnan Uni a stipula un agenda pa transforma nos mundo pa aña 2030. Esaki despues cu a realisa cu progreso den un pais mester bay man den man cu bienestar di e ciudadano. Aki na Aruba tambe, nos gobierno ta pone e ser humano central y den esaki e metanan di desaroyo sostenibel (SDG) ta core manera un liña cora den programa di gabinete Wever-Croes. E meta final: inclusion, caminda no ta laga ningun hende atras.

Pa sigura exito di e SDGs pa Aruba, nos mester di sinergia den nos maneho. Manera conoci, SDGs ta interconecta e dimensionnan economico, social, y medioambiental pa por acelera e metanan di Nacionnan Uni pa 2030. E sinergia entre sector publico, sector priva, NGOs, y academia ta hunga un rol esencial, specialmente considerando e retonan cu nos ta enfrenta como un pais cu ta formando parti di loke Nacionnan Uni ta considera SIDS, Small Island Developing States. Nos no por crea maneho mas basa riba procedura di pasado. Nos mester tuma un maneho mas comprensivo y mas coherente ora nos ta traha maneho nobo pa logra e metanan cu nos ta pone pa 2030.

Premier Evelyn Wever-Croes a gradici e comision di SDG Aruba pa e trabou di completa e rapport anual 2018. E comision di SDG Aruba ta e pioneronan den region pa cu e implementacion di e SDGs na Aruba.

‘Aruba ta determina y comprometi pa mehora calidad di bida di nos ciudadanonan y basa riba e metanan mundial di Nacionnan Uni, brinda oportunidadnan igual pa tur y no laga ningun hende atras. Hunto nos por enfrenta cualkier reto cu bin nos dilanti. Y asina forma un pais mas fuerte cu nunca’, premier Evelyn Wever-Croes a expresa.

 

LEAVE A REPLY

Please enter your comment!
Please enter your name here