Proceso burocratico a tarda firma di MoU entre Rep Dominicana y Aruba

Republica  Dominicana ta sigui haci esfuerso pa fortalece ainda mas e lasonan comercial y ayudo bilateral cu Aruba. 

Consul Dominicano na  Aruba, sra. Joselyne Rosario de Rosa a declara na Bon Dia Aruba cu ainda e MoU (memorandum of understanding) no a wordo firma, apesar cu esaki tabata e intencion ora cu nos prome mandatario a yega di bishita su pais aña pasa. 

E ta spera cu e aña aki nan lo por concretisa e proyectonan aki relaciona cu e firma di e MoU. E ta haya cu nan ta mas cerca cu leu cu esaki lo por bira un realidad. Sinembargo e ta mantene su discrecion ainda riba e tipo di acuerdo aki. Pero unabes cu e proyectonan aki  lo wordo ehecuta nan lo divulga nan debidamente.

MoU ta keda un prioridad

El a bisa cu e MoU cu ainda ta pendiente ta riba nan agendanan di prioridad pa e wordo firma.  El a agrega cu ainda e acuerdo di cooperacion aki no a wordo firma pa motibo di proceso burocratico. Pero nan ta warda cu e  prome autoridadnan envolvi den e proceso aki, entre nan e embahada di e paisnan di Reino Hulandes na Republica Dominicana hunto cu e autoridadnan  Dominicano y autoridad local, lo por concretisa nan esfuersonan pa e MoU lo wordo firma.

Consul Dominicano, sra. Rosario de Rosa a realisa tur esfuerso fei su consulado pa asina e firma di e MoU finalmente lo wordo concretisa, ya cu e acuerdo aki ta beneficia e cooperacion y actividad comercial entre ambos pais.  E diplomatico a indica cu esaki ta e tarea cu nan a haya fei nan presidente sr. Danilo Medina Sanchez pa nan como autoridad consular por sigui traha pa promove e balornan cerca nan hendenan cu ta biba afo di nan pais natal. 

“E lo ta un acuerdo di desaroyo comercial entre Republica Dominicana cu e isla di Aruba, y dicon no, cu henter Caribe”, el a bisa.

E plannan pa e intercambionan cu ta existi den diferente area como paisnan lo sigui, consul Dominicano a declara.  E ta haya fundamental pa sigui estrecha e lasonan aki riba tereno comercial, cultural, etc… Nan ta trahando riba diferente proyectonan cu nan lo desea di bira realidad. El a menciona cu tin logronan manera e mesun construccion di e plaza Dominicano, Juan Pablo Duarte, dilanti di hospital bieu cu a beneficia e comunidad Dominicano y  tambe a embeyece e area ey. 

Igualmente e diplomatico a bisa cu e comunidad Dominicano  ta contribui cu e desaroyo di e isla bunita di Aruba pa medio di nan trabou pisa y ehemplar na beneficio di e pais aki. Tambe el a expresa su gradicimento na nos autoridadnan local pa e acogida cu nan a duna na nan hendenan residencia riba nos isla.