Den fin di siman, prome minister di Corsou, Eugene Rhuggenaath a dirigi su mes riba su pagina di Facebook na su pueblo, pa duna aclaracion tocante negociacionnan di acuerdo di sosten di likides di Hulanda.

“Conforme palabracion y e compromiso cu mi tin cu boso, mi kier duna boso awe un update mas tocante nos combersacionnan cu Hulanda, den cuadro di e ayudo financiero cu nan a ofrece, y e condicionnan mara na esaki. Loke mi por bisa ta cu e combersacionnan a sigui di un forma intensivo. E tipo di negociacionnan aki no ta facil, ya cu mester tene cuenta cu hopi aspecto tecnico. Sinembargo mi por bisa cu nan ta productivo. Nos ta hayando mas y mas claridad, y ta logrando avancenan importante, pa nos por yega na otro.
Entre otro mi por bisa cu nos a clarifica e parti di ley cu ta toca e funcion di parlamento, con pa atende esaki cu e respet necesario. Asina ta logra mantene e posicion autonomo di nos pais, cual ta parti sumamente importante pa nos. Durante combersacionnan tambe nos a trece dilanti loke secretario di estado Knops mes a bisa tocante plan di inversion banda di e reformanan. Nos ta tratando pa esaki logra via e asina-yama Landenpakket, incluyendo otro documentonan mara na esaki, cu ta negociando simultaneamente. Asina por start cu e crecemento socio-economico cu tanto nos mester. Ademas a pidi aclaracion riba varios otro punto, inclui den e documento, manera duracion di e provision di ley pa un periodo di seis aña. Tambe nos a haci sugerencia pa Corsou tin mas participacion den e asina-yama.Entidad di Reforma Caribense (CHE). Atrobe, e unico forma pa logra avance ta door di sinta na mesa cu otro, compronde kico realmente ta e necesidad, y yega na solucionnan duradero pa nos pais. Mi kier enfatisa cu nos mester keda firme riba nos meta. Esta pa di un forma responsabel gobierno sigui cumpli cu su deber di sostene pueblo, incluyendo nos empresanan, trahadonan y esnan mas vulnerabel. Mientras ta crea espacio pa rebiba y modernisa nos economia, y crea cuponan di trabao duradero. Ta berdad cu nos mester di sosten financiero, anto urgente. E oferta di Hulanda, ta esey nos tin aworaki riba mesa, mara na condicionnan ya conoci. Mi ta sugeri pa cada un di boso pa keda corda cu mescos nos ta wak nos derechonan, nos mester wak nos obligacionnan tambe. Claro cu nos tambe a evalua varios fiansa riba mercado internacional y local. Pero e hecho ta, cu den un caso asina’ki, mester tene cuenta cu un tasa di interes halto, ya cu e riesgonan mara na nos pais ta halto. Na final di dia nos mester tin e capacidad di paga back e suma fia, plus interes. Y na momento cu no por paga back, sigur loke ta trata instancianan priva manera banco, e consecuencianan pa e pais lo ta serio. Djis pensa riba e hypotheek di bo cas. Hasta si bo fia di un mercado local, tambe lo nos haya nos cu interes tiki mas halto cu loke Hulanda ta ofrece.”

Miho deal cu esaki, practicamente no tin.

“Hulanda por facilita nos riba nan rating di riesgo y un tasa di interes di cero porciento. Miho deal cu esaki, practicamente no tin. Como gobierno responsabel, nos mester pensa riba solucionnan financiero responsabel riba termino largo, y no solamente wak e termino cortico. E combersacionnan cu Hulanda ta rekeri un acercamento bon delinea y profesional, cu ta pone cu no tur ora por comparti adelantonan cu nos ta haci inmediatamente cu boso. Mi kier pidi boso comprension pa esaki y tambe pa confia cu na su debido tempo mi lo tene boso informa. Gobierno por cierto a haci hopi esfuerso pa informa, splica y aclaria mas tanto posibel na gruponan di interes; lamentablemente no ta tur hende ta compronde e importancia di union y confiansa den e proceso. Esaki sin mas a stroba gobierno pa hiba un bon negociacion cu Hulanda. Lo mi sigui informa boso semanalmente tocante e resultado di e negociacionnan.”

 

LEAVE A REPLY

Please enter your comment!
Please enter your name here