Siman pasa, Prome Minister Evelyn Wever-Croes a habri e Caribbean Financial Action Task Force (CFATF) Pre-Assessment Training di dos dia, organisa pa Gobierno di Aruba. Esaki en conexion cu e preparacionnan pa evaluacion di CFATF otro aña.

CFATF ta un organisacion intergubernamental di estadonan den Caribe, Central America y Sur America cu a acorda pa implementa medidanan pa combati labamento di placa y financiamento di terorismo. E obhetivo principal di CFAFT ta pa logra implementa y cumpli efectivamente cu e normanan di FAFT pa preveni y controla labamento di placa y contraresta e financiamento di terorismo y proliferacion di armanan di destruccion masivo.

Aruba ta poni riba lista pa wordo evalua otro aña entre 28 di september y 9 di october. Un bon preparacion prome cu e evaluacion aki ta di gran importancia pa Aruba. Segun un comunicado di gobierno, tur agencia gubernamental y semi gubernamental cu ta traha riba e tereno di lucha contra labamento di placa, lucha contra terorismo y financiamento y lucha contra delincuencia en general, ta wordo curasha pa ta prepara pa e evaluacion binidero.

“Mi ta sigur cu e preparacionnan aki prome cu e evaluacion di otro aña lo brinda mas conscientisacion y conocemento necesario riba e tereno aki. Coordinacion y cooperacion ta elementonan clave den e esfuersonan pa mantene e integridad di e sistema financiero di Aruba. E lucha contra corupcion y promocion di integridad den Gobierno, den sector publico y den e sector priva, ta metanan clave di Gabinete Wever-Croes. Gobierno di Aruba ta comprometi, den interes general di Aruba, pa traha hunto den e esfuersonan contra labamento di placa y e financiamento di terorismo den un forma mas efectivo posibel. Hunto nos por logra mas”, Wever-Croes a duna di conoce.

 

LEAVE A REPLY

Please enter your comment!
Please enter your name here