Home Den Mi Cabes ‘Pronostico: tin un 100% posibilidad cu nos tur ta bay muri’

‘Pronostico: tin un 100% posibilidad cu nos tur ta bay muri’

714

NG Yakari.jpg

UTRECHT – Mi hendenan! Friendly reminders cu nos tur ta bay muri un dia. Awo, no kere cu mi ta giving up riba bida. Pero e biaha ki, mi no ta Sensitive Sally, Mi no ta Negative Nancy ni Positive Paully.

Awe, ta Bitter Betty a gara e pen! Ban papia! Mi hendenan, esta un desdicha. Entre e postnan di Carnaval y Mike Eman cu Otmar Oduber nan tiramento di post pa otro riba Facebook, mi ta gewoon aki nan cu asina un cara. Un siman liber di scol tras di lomba y mi ta cla pa e transicion di e ultimo lunanan di mi tercer aña universitario. Mi a kies pa specialisa mi mes den comunicacion y solamente di pasa wak e cursonan caba ya mi pia ta tembla. E lunanan aki cu ta bin ta bay ta bon duro, pues si mi disparce boso sa. Como bon millenial ami tambe ta biba yen duda y yen miedo. Mi kier un bon trabao, pero tambe mi kier ta feliz. Mi kier biba comodo pero tambe mi kier sinti cu mi trabao tin un proposito y mi no ta traha pa placa so. Pensando tanto riba futuro el a hiba mi bek na pensa riba mi propio habitonan.

No solamente riba un nivel personal, manera duna mucho di mi mes y despues keha cu hende ta cansa mi. Sino tambe riba con mi ta come y con esaki ta afecta mi bida. Awo, ta berdad mi tin un tiki dimas aki aya… hende ta yama nan curves, ami ta gewoon pensa mi tin cu baha tiki peso. Semper mi tabata kier tin un nek largo bunita, pero na su luga mi tin un nek cortico y si mi sigui come mi ta bay keda sin nek tambe. Bida na Hulanda ta solitario, ta hopi friu pafo y mi ta biba den un cas practicamente mi so. Pues cushina pa mi mes ta haci mi poco tristo y tin simannan cu Thuisbezorgd (servicio di deliver cuminda na Hulanda) ta gewoon mi escogencia. Pero ultimamente mi ta gewoon fada y mientras cu no tin nada den mi bida cu ta bayendo malo.

E frase ‘you are what you eat’ ta bin den mente. Nan kiermen bida solamente ta cambia ora bo fada di mesun estupidez y ami ta kere cu awo si mi a fada di esun di mi. Actualmente, mi tin un dos siman sin come carni cora. No pasobra mi ta bay bira un di e vegetariano annoying, pero mas bien pasobra mi kier test e efecto cu e lo tin riba mi curpa. Carni cora ta conoci pa ta algo masha duro pa digesti. Mi a crece den un cas humilde, pues di chikito mi a come locual tin. Aki aya tabata tin cos mi no tabata gusta manera sopi mondongo of lenga di baca. Pero na su luga, mi mama semper a haci un pida galiña pa mi pa mi no keda sin come. Dominicanonan no ta mucho amante di junkfood, pero no kere bo ta bay come cuminda tipico Dominicano tur dia y keda flaco. Mi ta purbando di come miho y tratando di educa mi mes riba cuminda y ki efecto nan tin riba e curpa humano. Claro cu e ta 100% sigur cu nos tur ta bay muri, pero mi a realisa cu mientras mi ta na bida mi kier hiba un bida di calidad. Mi no kier end up tur diabierna anochi ta trip y come cuminda di truck, mi no kier pasa cumpra pastechi tur mainta pa mi yiunan prome cu nan bay scol.

E cantidad di snacks cu tin na tur huki di Aruba ta preocupante y mi ta bitter pasobra:

1. Esaki ta un di e tiki maneranan cu hendenan por traha extra placa y grita boycott ta kita pan di hende su mesa.
2. E simplemente ta un realidad cu kroket, pastechi, empanada, etc. no ta cosnan cu nos ta supone di come tur dia pero fruta cu berdura ta caro. Bitter pasobra nos ta un isla chikito y aunke nos kier lo miho ta berdad cu hopi no por afford e.

Cu ora bo ta come un cuminda so pa dia y bono sa di unda e otro lo bin, bono ta bay kies un salada y mas bien lo opta pa algo cu lo yena bo. Mi ta bitter pasobra nos sa asina tiki tocante con pa cuida nos mes, con pa alimenta nos mes y con industria medico ta traha. Bitter pasobra nos tur sa cu pharmacianan ta un industria biyionario y ta depende di nos kebrante di salud pa triunfa.

Bitter pasobra mi no a cuminsa siña tocante nutricion prome, bitter pasobra ni cuanto mi tira zucchini den webo, hariña y seasoning e djis no ta smaak mescos chicken nuggets, pero bon mi ta determina. Mi ta catch boso nan up otro siman!