Trump ta menasa mientras Tillerson ta purba crea colaboracion

Presidente Donald Trump siman pasa a menasa di corta ayudo na paisnan cu ta produci o ta trafica droga. Esaki por tira un sombra riba loke secretario di estado Rex Tillerson ta purba logra, ora e mester sinta dialoga cu paisnan productor grandi manera Peru y Colombia.

Tillerson a causa sorpresa na bispo di su bishita na cinco nacion di Latino America ora el a sugeri cu e regimen di Nicolas Maduro na Venezuela por  wordo deroca pa su propio militarnan, comentario cu a crea debate durante su prome parada na Mexico.

Trump di su banda a bisa diabierna cu cierto paisnan, sin menciona nomber, ta basha droga den Merca. “Mi no ta menciona nomber awor mes… pero mi ta mira e paisnan aki, mi ta mira e cifranan cu nos ta manda nan anto nos ta manda nan ayudo masal, anto nan ta basha droga den nos pais y nan ta hari nos,” Trump a bisa na un mesa rondo televisa na Virginia.

Tillerson no a menciona comentarionan di Trump den un rueda di prensa na Buenos Aires pero un funcionario halto di State Department den e delegacion a comenta, sin identifica su mes, cu e palabranan di Trump “no ta yuda.”

Trump na varios ocasion a contradeci Tillerson riba asunto di politica internacional encuanto Siria y Korea di Norte, y e gobierno a ser critica pa manda mensahe contradictorio pa America Latino, particularmente tocante Venezuela.

Tillerson tabata na Peru ayera y Colombia ta e proximo parada di Tillerson programa pa awe, a haya como $10 biyon na fondo entre 2000 y 2015 pa programanan militar y social a traves di e asina yama Plan Colombia.

Anterior presidente Barack Obama a aproba $450 miyon na ayudo na 2017 pa Colombia, 25% mas cu na 2016, pa apoya un acuerdo di paz cu e grupo guerrillero FARC.

Peru, cu a mira su produccion di cocaina aumenta y ta carga e titulo di mayor productor hunto cu Colombia, a ricibi menos ayudo di Merca. Tillerson ta termina su gira na Jamaica, un hub creciente pa trafico di droga.

Merca ta e mercado mas grandi pa cocaina na mundo. Trump a menasa di corta ayudo na henter mundo, cuestionando kico Merca ta haya pa su apoyo. Mas prome e aña aki, el a priminti di termina ayudo na Pakistan.

 

You May Also Like

BRASIL: Nuebe morto na Rio de Janeiro di keintura geel

(JornaldoBrasil) E cantidad di morto di keintura geel na estado Rio de Janeiro a ...

Colombia: A evita otro atentado cu explosivo

Cuerponan di seguridad a indica cu diadomingo pasa nan a haya un artefacto, similar ...

Venezuela: Guaido a haya prohibicon di 15 aña pa tur puesto publico

Presidente encarga y presidente di Asamblea Nacional, Juan Guaido, a haya ayera un prohibicion pa ...

‘Gobierno’ di Boneiro a cay atrobe

Pa di 4 biaha den un mey aña e colegio cu ta goberna Boneiro ...

Video ta revela pago di 4 miyon dollar na campaña di presidente Peña Nieto

(Univision) Ciudad di Mexico – Luis Alberto De Meneses Weyll, ex-director di e empresa ...

Hezbollah ta un actor principal di delincuencia organisa na America Latino

Hende miho conoci como misionero Irani ta esun cu ta bati  alarma  pa chiismo, ...