editorial

 

Ta tempo pa un encuesta parlamentario?

Despues di e sorpresa y asombro pa actuacion di e ministro encarga cu Infrastructura den e caso Ocean Z, otorgando permiso pa cambio di e destinacion di erfpacht pa e tereno na Malmok, a bin e pregunta: pakico? Kico ta haci un ministro, cu un decision di hues den porta, pone e asunto tuma otro rumbo cu su decision. A tende hende referi na e grado di inteligencia di e ministro, pero realmente nos no ta kere cu e tin algo negativo cu esey. Nos ta kere cu ta trata di un ministro cu sa masha bon kico e ta haci. Aunke di otro banda e mes a crea duda cu su storia cu e mes ta ‘google’ e personanan cu haci peticion. Comentario tin cu no ta na ‘google’ e tabata referi, sino na ‘goochel’. Esey tambe nos lo laga un banda ya cu no ta nos prioridad awor.

Pero, analisando con henter e asunto aki a bay, nos ta pensa cu en todo caso e ministro a haci un cos obhetivamente visibel: el a crea condicion hopi mas faborabel pa Zissu Properties NV bay lanta caso contra Pais Aruba, awor cu hues a prohibi cambia e base di erfpacht, loke e ministro a caba di haci. Manera semper: nos ta sali di e pensamento cu e ministro tin solamente interes general di Aruba na consideracion… Pero e ora ta bira mas urgente pa e ministro splica su accionnan y kico ta e relacion cu interes general di Aruba.

‘Racetrack’ atrobe?

E rumbo cu e asunto aki ta tumando ta haci nos corda e caso di ‘Racetrack’ di añanan nobenta, unda compromisonan exagera a ser haci, cu despues mester a keda revoca, loke a crea e base pa e doñonan di e proyecto entama caso di daño y perhuicio contra Pais Aruba, loke a costa nos (pagado di belasting) miyones di florin. Cerca mas di un ciudadano tabata biba e pensamento e tempo ey cu ta ‘pa malo’ a haci e cos asina, ya cu asina e peticionario ta sali gana semper: of e ta haya e proyecto aproba, of e ta cobra masha hopi placa mes di daño y perhuicio. Naturalmente cu e tempo aya tambe nos tabata sali di e pensamento cu e mandatarionan di e tempo ey tabatin solamente interes di Pais Aruba na pecho y den mente. Mescos awor.

Poniendo un banda awor tur pensamento negativo tocante posibel motibo di e ministro en cuestion, basa riba mal intencion di su parti, e pregunta ta keda pakico el a dicidi di actua asina, aunke cu bon intencion, supongamos, pa por husga si e ta e persona adecua pa maneha asuntonan di e pais aki. Keto bay, si el a actua di buena fe, den su concepto, ta keda un realidad cu el a viola e ley cu e tabatin encargo como ministro pa cuida. Di dos cos uno: of bo a haci’e cu mal intencion, loke nos no ta kere, of bo a haci’e pasobra bo ta incapaz pa maneha e asuntonan aki di Pais Aruba na un manera adecua!

Encuesta parlamentario necesario

A base di tur esaki, lo no ta mas cu logico cu nos Parlamento yega na e decision di entama un encuesta parlamentario, unda tur persona envolvi por ser scucha bao huramento y tur documento al caso por aparece riba mesa. Y ora cu ta debati riba e encuesta, de paso Parlamento por tuma tempo pa debati riba e necesidad pa cambia nos Comptabiliteitsverordening pa crea extra condicion pa pone e ministronan personalmente responsabel pa nan accionnan. Y ey no ta trata di mal intencion, cual no semper ta posibel proba, ni tampoco necesariamente ta e caso. Pero, si un ministro ta rondona su mes cu hende cu supuestamente sa mas cu e mes, y semper tin un servicio gubernamental di legislacion na nan disposicion, no mester bin lamenta despues cu ‘mi no tabata sa’. Nos no ta yega nunca na gobernacion drechi den e pais aki si nos no ta cuminsa exigi cu e impunidad ministerial cu awor practicamente ta existi, no ta disparce.

Nos conoce e argumento di e otro banda caba: “si bo haci esey, anto bo no ta haya hende bay den politica mas”. Nos lo bisa: “que sea así”. Y de paso nos kier lansa e siguiente pregunta: ”Pakico den otro pais unda tin regla severo pa loke ta responsabilidad personal di mandatario, aparentemente nan no tin ningun problema pa haya hende pa bay riba lista of bira ministro?” E existencia di ley severo pa e cosnan aki no a condena ningun hende di antemano; ta ora keda comproba cu bo a viola e ley aki, ta e ora husticia lo mester bay core su curso. Esun cu no kier bay den politica pasobra e tin miedo di bay cera, ta pasobra e ta teniendo cuenta caba cu e ta bay haci malo, y ora nan haye, ate den problema. Ki tempo nos a cria custumber di tene cuenta cu hende, cu no ta bay den politica pa sirbi nan pais, pero pa sirbi otro interes?

LEAVE A REPLY

Please enter your comment!
Please enter your name here