Rainbow Warriors Core Foundation a acerca Bon Dia Aruba cu e critica riba un proyecto den lama na Savaneta, cu segun nan averiguacion y opinion ta un construccion ilegal cu no tabatin e permisonan corespondiente. Ademas e construccion lo a tuma luga den un area di mangel unda lo a kap mata pa traha e proyecto, loke ta contra maneho di Pais Aruba.

Riba website di e compania en cuestion (www.arubaoceanvillas.com) por mira loke Rainbow Warriors ta yama “un version miniatura di e proyecto di Zoetry Isla di Oro, cu no a continua pa motibo di e cantidad di protesta y critica for di comunidad.

Segun Rainbow Warriors, nan a averigua cerca Directie Natuur en Milieu (DNM) y a haya sa cu nunca tabatin entrega di un Milieu Effect Rapportage (MER) como base pa evalua e proyecto aki. E fundacion ta denuncia tambe cu mientras tanto e proyecto lo a haya opcion pa 15 unidad, incluyendo e 7 unidad cu ta construi caba, prome cu tabatin permiso pa esaki. Loke lo ta un legalisacion ‘achteraf’.

E proyecto ta situa na e luga unda tabatin e restaurant The Old Man and the Sea, unda tabatin problema caba den pasado reciente cu construccion di un gazebo den awa, sin permiso di e autoridadnan concerni. Esaki a hiba na problema serio cu DOW cu na diferente ocasion a acudi pa para e construccion.

Den e corespondencia di e tempo ey, entre otro un carta di director di DOW unda e ta pone e echonan tras di otro, por ripara con diferente mandatario ta contradeci otro y no tin un maneho uniforme cu e funcionarionan responsabel por uza como guia.

E Director ta bisa den su carta: “Pasobra dirigencia (ministronan; red.) no a posiciona su mes di manera uniforme encuanto e actuacion pa mantene (orden y ley) contra H., e colaboradornan di Dienst Openbare Werken ta den incertidumbre si nan mester actua pa mantene orden of no.” Tambe e ta añadi: “ Mi ta pidi anto pa trata di haya Conseho di Ministro asina leu pa tuma un punto di bista uniforme pa loke ta trata e mantenimento di interesnan di derecho priva y di administracion publico di Pais Aruba contra H.”

Nota di Redaccion:

E carta di Director di DOW ta data di 1 di juli 2019. Parce cu gobierno a cambia, pero ainda aparentemente no a bin un maneho coherente pa e tipo di proyecto aki, cu ta contrario na maneho di gobierno y sin embargo ta continua y hasta ta expande. Esaki tin consecuencia pa mantene orden y ley den otro casonan tambe.

 

LEAVE A REPLY

Please enter your comment!
Please enter your name here