Pueblo di Aruba, sea alerta. Tin un minister cu ta imagina su mes gran comerciante y ta pasa ta privatisa companianan estatal pa asina participa cu comercio den sector priva. E realidad ta, cu e minister concerniente no por mustra ni un ehempel di un empresa cu el a maneha cu lo por ta exitoso sin e asistencia di su Gobierno.

E minister ta pretende di ta gran comerciante, pero tur compania cu e ta maneha ta opera bou di leynan cu ta faborece e companianan aki, creando un competencia inhusto pa comercio local. Ningun comerciante por competi cu companianan cu tin e beneficio di autoridad special, monopolio of proteccion di leynan preferencial.

E logro real di e ministro-comerciante aki ta, cu a pesar di tur privilegio y ley preferencial asina mes e ta logra pa sigui perde placa tur dia. Esaki ta posibel pasobra Gobierno ta keda responsabel pa financia e perdida di e companianan aki. Ganashi ta bay pa e compania y esunnan cu ta dicidi con ta reparti e bolo. Pero den caso cu tin perdida, esey ta bay pa Gobierno y pa e pueblo paga. Na final ta pueblo ta paga pa e aventuranan aki. E playing field no ta level, e wega no ta husto. Den bon Papiamento nos ta yama esaki “wega di ladron”.

E ministro cu pretension di ta gran deal-maker y entrepreneur mester compronde cu den sector priva honesto, un compania cu no por produci suficiente entrada pa cubri su gastonan simplemente no tin derecho di existencia. Tur compania cu e ministro aki ta pretende di ta opera na un manera exitoso, realmente a fracasa. Ta e trato preferencial cu nan ta ricibi di Gobierno ta haci cu nan por existi keto bay.

ATA, TPEF, Arubus, Arutram, Aruparking, ANSA y awor Serlimar. Tur ta existi pa motibo di trato preferencial. ATA, TPEF y ANSA tin e beneficio di ta un monopolio, pues claro nan ta “exitoso”. Arubus te awe ta financieramente bancarota y no ta factibel sin e sosten di Gobierno. Arutram y Aruparking ta dos fracaso monumental, cu no solamente a hinca pueblo den debe grandi pero tambe a kibra comercio den Playa. Awor ta e polemica di Serlimar ta ilustra e mas recien aventura di e ministro aki.

Si nos tuma Serlimar como un ehempel nos ta mira un compania cu:

  • tin por lo menos 4 aña cu nan no a entrega un relato financiero
  • no ta cobrando su clientenan pa e servicionan cu nan ta duna
  • no ta ni paga na Ontvanger der Belastingen e premies cu nan a retene di nan trahadonan, loke ta crea un competencia inhusto pa e comerciante cu si ta cumpli cu su debernan fiscal

A keda den man di nos Parlamento pa stop cu e racha di habracamento aki. Nos ta keda pendiente pa mira si realmente Parlamento ta tuma e responsabilidad pa cumpli cu nan trabou.

 

LEAVE A REPLY

Please enter your comment!
Please enter your name here