E tricolornan di Solito, RCA a gana nan prome trofeo di e temporada nobo cu e CDEM 2019. Den e gran final RCA ta derota Caravel 3 – 0 cu dos gol anota pa Jeanpierre Fingal despues cu Andrew Martinez ta habri marcado.

Mester bisa cu RCA a tuma e iniciativa den e prome minuutnan di wega hungando bon toke. Caravel di otro banda e purba cu e balanan largo uzando su puntanan y memey cu Loduwika y Andrea. E prome bon tiro riba gol di Caravel a bini na di 17 minuut pero esaki a pasa over di gol. Na di 24 minuut RCA ta anota e 1 – 0 riba un tremendo combinacion na banda drechi cu Glenbert, Jeanpierre y ultimo Andrew Martinez cu ta anota e gol di bay ariba. Caravel tabata tin algun momento bon cu algun tiro pero sin mucho etiketa di gol. E delanteronan Andrea y Loduwika no tabata ti e facil cu e linea di defensa comanda pa Christiaan y Chito. Di otro banda RCA drenta hopi den e area penal di Caravel pero no por a finalisa su balanan den un gol cu Jeff Werleman basta atento riba e hugadanan.

Den e di dos tempo, RCA a sali brabo y hunga full riba e atake unda e crea varios oportunidad pero portero Jeff Werleman a luci mientras otronan a sali desvia. Di otro banda Caravel a haya un chens morto unda e alero Parra ta faya di cerca, su bala ta pasa halto over di gol. Na di 57 minuut, capitan di Caravel y homber clave den defensa Weimar Galeano ta haya carchi cora riba un infraccion contra di defensa Croes. Esaki complica tur cos pa Caravel. Despues di e carchi di Galeano, RCA a probecha bon unda a ataca constantemente pero e defensa di Caravel y sigur portero Werleman tabata bon planta y anticipa e hugadanan na ora. Mester bisa cu e wega a bira poco bruto unda hungadonan dado momento a lubida cu ta futbol nan ta hungando cual a haci e wega uno para.
Na di 67 minuut, RCA ta anota e di 2 – 0 ora cu Jeanpierre Fingal ta anota un gol tras di un bon cruse. Un rato despues tabata un bes mas Jeanpierre Fingal kende ta haci e wega 3 – 0 tras di un bon cruse for di banda robes.

Richard Dijkhoff Presidente A.V.B. a entrega trofeo Campeon na Walter Bennett di R.C.A. Presidente R.C.A. Sr. Ditto Acosta a entrega trofeo Sub-Campeon na capitan di Caravel.

Premio Individual:
Goalgether Ronald Gomez
King of Asst Ronaldo Brujes Valderama
Best Keeper Joshua Farro
Miho Defensa Chito vd Biezen
MVP Jeanpierre Fingal

Directiva di RCA kier a gradici nan patrocinadonan.

15 Man of the Match di 15 wega:
Joshua Viotty (Brasil jrs), Devis Oliveros (Nacional), Weimar Galeano (Caravel), Sylvester Schwengle (La Fama), Francis van der Linden (Britannia), Sebastian Montoya (Dakota), Gilbert Bautista (La Fama), Kenrick Dania (Caravel), Owen van der Wijde (Britannia), Antonio Lopes (Bubali), Ronald Gomez (RCA), Erik Santos(RCA) Eric Abdul(RCA), Glenbert Croes (RCA).

E torneo tawata dedica na miembro di honor di RCA Edwin Dirksz, Serge Mansur y Famia. Tambe RCA na ocasion 85 aniversario a duna un gradicimento na Lito Kelly cu mas di 15 aña a dedica boluntariamente na entrena divisionnan U5 te cu U20. Tambe na e duo fantastico Eric Henriquez y Juan Sevinger, dos boluntario cu pa 8 aña a bati schouder pa hiba team Damas RCA na hopi exito.

Diadomingo atardi e programa a start cu un bunita encuentro entre ROMA y INTER 45+ cu ta termina empata 2-2 y trofeo ta bay pa Angel vd Biezen cu a hunga den ambos ekipo. Despues a continua cu un partidaso unda Damas RCA ta vence seleccion di Aruba 2-1. Directiva RCA ta gradici tur ekipo cu a participa pa haci e torneo exitoso y na tur e fanaticada cu a yega stadion pa anima den bon atmosfera y tambe contribui na e fundraising aki di RCA.