Aña pasa pa prome biaha e comision SMAC a organisa e parada di flambeu (fakkel), y un biaha mas nan a haci esaki. President di e comision Sr. Randy Thiel ta haya cu e parada di flambeu a bay sumamente bon, aunke cu tin e caso cu hopi hoben tabata bou consumo di substancia. Maske cu ta prohibi pa e hobennan haya alcohol den e gruponan, asina mes nan ta haya manera pa haya e alcohol.
Den comparacion cu aña pasa pa e organisacion di SMAC esaki a bay bon di locual ta participacion, di ambiente y di parti e siguridad di e parada mes. Pa loke ta encera e comportacion di e personanan para na banda y e participante, esaki en general tabata bon. Segun Sr. Thiel na Bon Dia Aruba, e publico a trata su mes asina nechi. Durante e parada segun e president, e tabata pariba y pabou y aki el a ripara hendenan no tabata stroba participantenan pa disfruta di carnaval.
Muchanan tabata bou influencia
Lamentablemente tabata tin basta mucha hoben cu tabata bou di influencia di alcohol. “Mi ta kere cu esey nos tin cu bay conscientisa un tiki pa locual cu ta tira un bista riba e muchanan pa esey no pasa mas den e carnavalnan. Pero por lo demas den parada mes hopi bon comportacion, tur hende tabata alegre, un tremendo fakkel,” el a bisa Bon Dia Aruba.
No ta haya bebida na bar
A puntra Sr. Thiel si a bin cu sugerencia cu ora gruponan habri inscripcion pa participa den paradanan di carnaval si lo bin cu un edad minimo pa asina evita cu hobennan ta bou influencia di alcohol of otro substancia. E ta bisa cu ora tin reunionnan cu lidernan di grupo ta stress hopi riba e punto aki. “Pero manera nos ta bisa e lidernan di grupo sa di esaki. Nan ta percura pa esaki no pasa. Pero lamentablemente tin hende grandi cu ta apoya e tipo di cosnan aki,” Sr. Thiel a bisa. E muchanan no ta haya bebida na bar, pero di un manera of otro nan ta buscando pa haci esey. Entre otro cu otro hende mas grandi si ta busca e alcohol pa e hobennan aki.
