Minister Oduber a duna gabinete Mike Eman II su ultimatum ayera por medio di un carta na gobernador. E ta spera cierto cambio grandi den e maneho prome cu 1 di maart sino e lo tuma su retiro. Pero analisando su post riba Facebook, e ta mustra un ‘done deal’.
Diahuebs prome minister Mike Eman ta sinta cu sr. Oduber riba e situacion. Por lesa loke Minister Eman a reacciona den e articulo cu sigui aki bou. Aki bou por lesa e post di minister Oduber despues cu el a papia cu prensa:
“Cu conviccion grandi y cu interes general na pecho awe tardi ma entrega na nos Gobernador mi decision final pa loke ta trata mi futuro como Minister. E situacion ta uno den cual mi no ta identifica mi mes mas cu cierto puntonan clave di e maneho actual di Gabinete Mike Eman II. Tin diferente puntonan di atencion riba bienestar nacional cu mi no ta comparti y ta sinti cu no ta hayando e atencion necesario. Porta no a wordo cera, semper tin espacio pa haci e cambionan na bienestar nacional, mientras tanto e decision ta cu entrante 1 di maart lo mi entrega e posicion di minister pa asina por finaliza diferente proyecto di gran importancia y haci e transicion pa e siguiente minister uno mas facil posibel.”
Preocupacionnan grandi
Despues su reunion cu gobernador el a bisa prensa wardando pafo cu el a comparti su preocupacionnan ‘hopi grandi’ cu gobernador riba e maneho. “Tin un crisis den e sentido di un diferencia di opinion hopi grandi entre mi persona y gabinete. Pa loke ta e situacion di carnaval y permisonan esakinan ta solamente tip riba e ijsberg cu ya tabatin”, Sr. Oduber a enfatisa.
Siguridad y financia publico
“Tin diferencianan di opinion cu ta wordo bringa y discuti paden y respet semper mi tabatin pa mi gabinete. Pero cierto momento ora cu no ta haya oido mas paden y ora ta papia di bienestar general pa loke ta trata maneho di husticia y siguridad den comunidad. Ora ta traha cu alma y cuerpo 14 of 16 ora pa tin un turismo na e nivel cu e ta actualmente. Ora cu den 6 aña den tur rapport ta indica cu e economia a bira fuerte a base di e maneho aki di henter ekipo di e mesun decisionnan cu e gobierno aki a tuma cu a logra e bienestar aki den e pilar economico aki. Y cu no momento cu no ta haya oido riba e menasanan mas grandi cu tin, e ora mester comunica esaki na un nivel mas halto pa e atencion wordo brinda mescos cu ta e caso cu financia publico.”
Segun Sr. Oduber esakinan ta algun di e puntonan unda cu e ta sinti cu e no ta haya atencion debido den e team cu e ta forma parti di dje. Cual ta haci cu e mester recuri na un otro decision.
Contenido ultimatum
“Mi a entrega un carta cu ta indica cu pa prome di maart si mi no ta mira un diferencia of cambio pa loke ta bienestar general di Aruba. Un cambio specificamente riba e dos terenonan aki y hopi mas preocupacion manera e sosten cu mester tin di coleganan di husticia, enseñansa of financia por ehempel, e ta dificil pa un persona continua su labornan si bo no ta acorda mas cu e pensamento di e reto di gabinete.”
Finalmente e minister ta bisa cu te cu awor no tin e plan pa lanta un partido politico nobo y sigui su futuro den politico.
.jpg "Minister Bermudez ta kibra silencio riba nombracion gobernador")
