Un estudio nobo di Economisch Bureau Amsterdam ta pone Aruba den un posicion relativamente avansa dentro di Reino Hulandes ora ta trata di competencia y proteccion di consumidor. Mientras Bonaire, Sint Eustatius y Saba ainda no tin un ley general di competencia, Aruba ya tin un marco legal, un autoridad independiente y, desde maart 2026, Aruba Fair Trade Authority (AFTA) tambe tin responsabilidad pa supervision di leynan di proteccion di consumidor.

E rapport, titula “Fair Markets, Better Protection – Towards competition and consumer protection policy in the Caribbean Netherlands”, a ser prepara pa Economisch Bureau Amsterdam y finalisa na juni 2026. E estudio a ser encarga pa Ministerio di Asuntonan Economico y Clima di Hulanda, den cooperacion cu entidadnan publico di Boneiro, Sint Eustatius y Saba.

Aunke investigacion ta concentra principalmente riba Caribe Hulandes, Aruba ta aparece varios biaha como punto di comparacion. E experiencia Arubano ta ser uza pa ilustra con un economia insular chikito por introduci regulacion di competencia y proteccion di consumidor, pero tambe pa mustra e limitacionnan cu legislacion asina tin ora problema di prijs ta origina den structura economico di un isla.

Segun e rapport, economia di isla chikito tin caracteristicanan cu naturalmente ta limita competencia. Mercado ta chikito, dependencia di importacion ta halto, suministro ta depende di un cantidad limita di ruta y costo di transporte ta relativamente halto. Esaki ta nifica cu prijs halto no necesariamente ta resultado di falta di competencia of comportamento ilegal di empresa. Un parti di e costo ta directamente relaciona cu escala y posicion geografico di e islanan. E estudio ta indica cu e mesun observacion, aunke den un grado menos fuerte, ta conta pa Aruba, Corsou y Sint Maarten.

Pa Aruba, esaki ta un diferencia importante. Debate tocante costo di bida frecuentemente ta enfoca riba prijs den supermercado, costo di servicio y posicion di empresanan grandi. E rapport ta enfatisa cu politica di competencia por yuda mercado funciona miho, pero e no ta un solucion lihe pa baha prijs.

Un dato specifico tocante Aruba cu e estudio ta menciona ta e peso di cuminda den presupuesto di famianan cu salario minimo. Segun e fuente uza den e rapport, casnan na Aruba cu ta biba na nivel di minimo di subsistencia ta gasta rond di 40% di nan entrada riba cuminda. Den comparacion, e proporcion menciona pa Merca ta 13.8% y pa Hulanda 19.2%. E rapport tambe ta señala cu nivel di prijs na Aruba y Corsou ta considerablemente mas halto cu na Hulanda y Merca.

E cifranan ta ilustra dicon funcionamento di mercado y proteccion di consumidor tin importancia directo pa Aruba. Si un parti grandi di entrada di un famia ta bay na necesidadnan basico, cambio den prijs por tin un impacto relativamente grandi riba poder di compra.

Sinembargo, e estudio ta adverti contrae expectativa cu introduccion of fortalecemento di ley di competencia automaticamente lo resulta den prijs mas abao. Politica di competencia principalmente ta pa evita abuso di poder di mercado, acuerdo ilegal entre competidornan y otro practica cu ta stroba competencia husto. Su efecto riba prijs generalmente ta indirecto y por tuma tempo pa er nota. Pa logra reduccion substancial di prijs den corto plaso, segun e rapport, otro medida manera regulacion di prijs, subsidio of intervencion dirigi riba structura di costo por ta necesario.

E rapport ta subraya cu Aruba, mientras tanto, ya a implementa un parti importante di e structura cu e investigadornan ta recomenda pa Caribe Hulandes. E rapport ta indica cu Aruba tin un ley di competencia y su propio autoridad, AFTA, desde 2020. Desde maart 2026, AFTA tambe ta responsabel pa supervision di leynan di proteccion di consumidor. Ademas, regulacion economico ta den proceso di implementacion y intencion ta pa pone esaki bao responsabilidad di AFTA.

E combinacion aki ta importante pasobra, segun e estudio, politica di competencia, proteccion di consumidor y regulacion economico ta estrechamente conecta. Na varios pais, incluyendo Hulanda y Aruba, diferente responsabilidad den e tereno aki ta cay riba un solo autoridad independiente. E idea ta cu supervision di mercado ta bira mas coherente ora e autoridad por wak tanto comportamento entre empresa como proteccion directo di consumidor y, unda ta necesario, regulacion economico.

E estudio tambe ta referi na investigacion anterior di AFTA tocante acuerdo di distribucion exclusivo na mercado di Aruba. Segun e rapport, informacion di Aruba ta mustra cu por tin acuerdo di distribucion exclusivo entre empresa cu no ta formal, pero cu den practica por limita competencia. E observacion ta ser conecta cu un caracteristica mas amplio di economia chikito, unda relacion social, politico y economico frecuentemente ta cerca di otro.

E rapport mes ta señala un diferencia importante entre riesgo y infraccion comproba. Den su analisis di mercado, e investigadornan ta evalua condicionnan cu por aumenta posibilidad di comportamento no competitivo, pero e estudio no ta un investigacion pa determina cua empresanan specifico a viola ley. E rapport ta señala cu prijs halto por ta consecuencia tanto di e caracteristicanan di un economia insular como di competencia limita, y cu no semper ta facil pa determina cuanto cada factor ta contribui na e prijs final.

Pa Caribe Hulandes, Economisch Bureau Amsterdam ta recomenda un combinacion di proteccion mas fuerte pa consumidor y introduccion di un ley di competencia BES. E ley lo inclui prohibicion di cartel, prohibicion di abuso di posicion dominante, control di fusion entre empresa y un funcion pa autoridad di competencia duna conseho tocante efecto di politica publico riba mercado.

E modelo no ta simplemente pa copia ley Hulandes. E rapport ta considera cu escala chikito di e islanan ta exigi adaptacion di reglanan na e realidad local. Limite financiero, boet y manera di supervision mester ta proporcional na e tamaño di e mercado y empresa. E estudio ta propone un implementacion gradual, cu informacion y conscientisacion manera prome paso, sigui pa legislacion formal y finalmente mas cooperacion entre autoridadnan dentro di Reino.

Aki ta caminda e experiencia di Aruba por haya un rol mas primordial. E rapport ta señala cu Autoriteit Consument & Markt (ACM) di Hulanda ya tin un relacion di cooperacion cu AFTA. E experiencia cu AFTA ta ser menciona manera un factor cu por facilita implementacion di supervision nobo na Caribe Hulandes, pasobra ACM ya tin experiencia di cooperacion den contexto di Caribe.

Den fase di termino mas largo, e investigadornan ta considera cooperacion mas fuerte entre ACM, AFTA y Fair Trade Authority Curaçao (FTAC) manera un opcion practico. E por inclui intercambio di conocemento, colaboracion den investigacion, compartimento di experticio y desaroyo di forma comun di supervision. E rapport tambe ta propone asistencia na Sint Maarten pa introduci su propio politica di competencia.

Un ley di competencia pa henter Reino ta ser considera menos realistico pa e momento. Aruba, Corsou, Sint Maarten y Caribe Hulandes tin posicion constitucional diferente y nan politica di competencia ta na diferente fase di desaroyo. Segun e estudio, un sistema completamente integra lo rekeri un nivel halto di coordinacion politico y disposicion pa comparti autoridad regulatorio. Pa e motibo ey, cooperacion entre autoridadnan existente ta ser considera mas factibel cu un solo ley pa henter Reino.

Pa Aruba, e rapport por ser interpreta manera un reconocemento di progreso como tambe manera un recordatorio di e limitacionnan di politica di competencia. Aruba actualmente ta entre e hurisdiccionnan den e parti Caribense di Reino cu un structura mas completo pa competencia y proteccion di consumidor. Alabes, existencia di ley y autoridad no ta elimina automaticamente e factornan structural cu ta haci bida caro riba un isla.

Dependencia di importacion, transporte, escala chikito y cadena di suministro internacional ta keda factornan importante den formacion di prijs. E estudio ta enfatisa cu politica di competencia ta un parti necesario di un strategia mas amplio, pero no por resolve tur distorsion di mercado. Pa controla costo di bida y costo di haci negoshi un enfoke integra ta necesario.

E rapport ta mustra cu pa Aruba e reto no ta solamente pa tin legislacion di competencia y un autoridad manera AFTA, sino pa percura cu e hermentnan aki ta funciona efectivamente y ta ofrece proteccion concreto na consumidor. Alabes, cooperacion cu otro autoridadnan dentro di Reino por bira cada bes mas importante, teniendo cuenta cu mercado y cadena di suministro ta traspasa frontera di cada isla. Finalmente, e meta ta pa Aruba logra un mercado mas transparente y husto, teniendo na cuenta e limitacionnan di un economia insular chikito.