Despues di 45 aña cu no a tuma luga un convencion pa establece reconocemento ‘sin discriminacion’ di titulonan academico (educacion superior) entre paisnan Latino Americano y Caribense, un convenio nobo cu lo conta pa Aruba tambe lo haci cu den region titulonan academico procedente di otro pais lo ta mas acepta.

Den un comunicado, Minister di Enseñansa Rudy Lampe a anuncia su participacion na reunion di UNESCO na Argentina. Durante e reunion aki gobiernonan regional a aproba un convenio nobo pa loke ta trata reconocemento di diplomanan y gradonan academico di nos region di Latino America y Caribe.

E ultimo convencion cu a yega di tuma luga riba e topico di educacion superior pa Latino America y Caribe tawata na aña 1974 y ta te awor na 2019 a organisa un atrobe. E convenio final ainda mester wordo ratifica, firma y aproba pa gobierno di Reino ya cu nan ta esunnan responsabel pa firma tur asunto internacional. Unabes e convenio aki drenta na vigor e lo conta tambe pa Aruba.

E encuentro aki na Argentina tawata uno historico pa loke ta trata e iniciativa cu Aruba a tuma den e convenio final, cual ta haci mencion explicito di e miembronan asocia di UNESCO. Te aworaki ta solamente haci referencia na e miembro estado cu ta Reino Hulandes (lesa: Hulanda) y no ta menciona e miembronan asocia di cual Aruba, Corsou y St Maarten ta forma parti.

E mencion di miembronan asocia a ser reconoci den e documento final na unda ta menciona tambe nan contribucion pa cu e documento final. Esaki ta un muestra mas cu gobierno lo continua promove Aruba y su esfuersonan riba nivel internacional, segun Minister Rudy Lampe.

 

 

LEAVE A REPLY

Please enter your comment!
Please enter your name here