Representante di DUO na Aruba pa comparti informacion pa studiante

Departamento di Enseñanza ta anuncia cu entrante otro siman lo bay tin presente representante di DUO (financiamento di estudio) pa splica tocante e proceso di financiamento y duna informacion.

Rosalinda Croes di departamento di Enseñanza a duna di conoce cu e meta principal di esaki ta pa informa studiante tocante con pa busca ayudo pa paga bek of relaciona cu debe cu nan tin. Tambe pa aplica pa DUO.

Ademas di e anochi informativo, lo informa riba rednan social of tambe por pasa personal na departamento di Enseñanza. Dia 19 di maart binidero pa 7or di anochi lo tin e anochi informativo. Persona cu kier registra por haci esaki riba e website di DUO, ya cu ‘tur cos ta bay online’. Pa anochi informativo hende por pasa JFK pa obtene e informacion con pa aplica.

Croes ta splica pa persona cu no sa, DUO ta e financiamento pa estudio di Hulanda, manera Arubalening. E enfatisa cu ta importante pa studiante sa cu nan mester DUO na momento cu ta bay studia na Hulanda, pa por cubri e costonan. E ta amplia cu Arubalening riba su mes no ta suficiente. Pa e motibo aki ta enfatisa cu mester aplica pa e prestamonan na tempo.

Tambe Croes ta duna di conoce cu actualmente DUO ta fia cu 0% di interes pa algun aña caba, igual na Arubalening awo. “Si e studiante ta fia 100.000 florin ta esey tin cu paga. Pa mas informacion por pasa na edificio di ex-Codemnsa.” Nan ta bay muda pa edificio di John F. Kennedy, dia 2 di april nan ta cuminsa atende publico bek na edificio nobo.

El a expresa cu e eliminacion di interes ta un alivio pa hopi hende y cu esaki ta pa keda stimula e studiante. E prestamo aki ta conta tambe pa IPA, Universidad di Aruba, pa tur persona cu ta aplica. Pa esunnan cu stop cu e lening y ta djis sigui cu DUO, nan lo mester djis paga pa locual nan fia sin interes.

Nan ta recomenda pa studiante check website ‘studiekeuze123.nl’. Aki e studiante por tin un miho bista di kico nan kier studia. Croes ta duna di conoce cu scol di Hulanda ta exigi nan studiante pa haci esey, pa check cua ta nan interes specifico, cua carera nan kier sigui y nan por tin un miho bista.

Pa esunnan cu ta bay otro pais, ta ricibi Arubalening pa tanto aña.

Studiantenan ademas por busca mira si tin trabou na Aruba den e ramo cu nan kier studia pa ora nan caba, esey ta importante. “Evaluacion ta importante prome cu haci un escogencia pa un estudio”, Croes a bisa. Pa finalisa el a bisa cu ta trahando riba mas plan como departamento pa asina motiva e studiante pa bin bek nan pais pa traha akinan.