(AP) – Reina Elizabeth II y e famia real Britanico ta sostene e movemento di Black Lives Matter, un di su representantenan a bisa den un entrevista di television diabierna.

Filantropo Kenneth Olisa, e prome Black Lord Lieutenant of Greater London, a conta Channel 4 News cu el a discuti e topico cu miembronan di e famia real desde e morto di George Floyd den custodia di autoridadnan na Merca aña pasa, cual a causa protesta pa cu inhusticia racial den henter mundo.

Ora di puntra e famia si nan ta sostene y apoya e movemento, e filantropo y comerciante, ken ta e monarca su representante personal den Greater London, a bisa “e contesta ta facilmente si.”

“Mi a papia tocante e topico di rasa cu e famia Real, particularmente den e ultimo 12 luna desde e morto di George Floyd,” el a bisa den partinan di e entrevista cu a ser revela prome cu e lansamento. “E no ta un topico cayente. E pregunta ta kico mas nos por haci pa por uni nos sociedad y kita e bareranan aki. E famia Real ta comprometi cu hopi pasion pa por converti e pais aki un nacion cu ta uni pa e mesun balornan.”

E comentarionan ta bini den bista cu e Palacio Buckingham ta batayando contra acusacionnan di racismo cu e Duke y Dukesa di Sussex a trece dilanti, tambe conoci como Prins Harry y Meghan, durante un entrevista cu Oprah Winfrey na maart.

Meghan, ken ta un persona biracial, a bisa cu un miembro di e famia real, ken e no a identifica, a expresa “preocupacion” pa cu e tono di cuero cu e baby lo tin na momento cu e duna luz na su prome yiu. E pareha tambe a alega cu Meghan tabata victima di tratonan menos bunita durante su tempo como un miembro di e famia real activo.

Prins William, Harry su ruman homber grandi, a ser forsa di responde despues cu reporteronan tabata keda grita preguntanan na su persona durante un bishita na un scol di East London.

“Nos no ta un famia racista,” William a bisa mientras cu su casa, Kate, tabata canando su banda.

Harry y Meghan a retira di nan responsabilidadnan real anteriormente e aña aki, y a muda bay biba na California.

LEAVE A REPLY

Please enter your comment!
Please enter your name here