Pic2 Perforacion Gas.JPG

Repsol a dicidi di continua cu nan proceso y bora den subsuelo di Aruba en buskeda di mineralnan potencial. Esaki a wordo anuncia ayera atardi den sala di Conseho di Minister.

E decision di Repsol, cu hunto cu Total tabata sondeando pa posibilidad pa busca gas den awanan teritorial panort di Aruba pa un par di aña caba, tabata den aire pa basta tempo pero a cay porfin den fin di siman. Aworaki lo cuminsa bora realmente en buskeda di gas awor cu a haya suficiente indicacion cu tin algo bao di e subsuelo pa por tuma e risico financiero pa inicia cu e boramento di berdad, asina Willy Hernandez, manager regional di Repsol a splica. E boramento aki lo por tuma luga te aki 1 pa 2 aña y por tin gasto di 50 miyon dollar cu ta core pa e cuenta di e companianan Repsol y Total, hasta si nada wordo haya. Cuater area prospecto a wordo designa, despues di e dos sondeonan nomber cu a tuma lugar te aworaki y cu a costa un total di 56 miyon dollar. E areanan, cu ta core di pabou te pariba na un distancia di entre 30 pa 40 kilometer for di costa panort di Aruba a haya nombernan Lagadishi, Dushi, Kinikini y Bon Bini.

Boramento real
Segun Minister Mike de Meza, e di tres fase aki ta nifica cu den e dos aña y mey cu ta nos dilanti, cuminsando for di 20 di December, tin cu tuma un decision unda precisamente ta bay haci e perforacion di prueba di subsuela den awa teritorial di Aruba. “E cuater prospectonan ta areanan di interes, ohala na fin por perfora tur cuater pero conhuntamente cu Total & Repsol, lo delibera pa tuma un decision consenso na cua ta e prome perforacion cu nan ta bay haci,” Miniser de Meza ta splica. Hecho ta cu awo ta drenta e di tres fase di exploracion. Segun Prome Minister Mike Eman, a inicia e proceso aki pa motibo cu bo tin e responsabilidad como pais pa busca un caminda cu por tin oportunidad economico. “Despues di a logra gana interes di Repsol pa haci un sondeo inicial riba diferente nivel tecnico, den fin siman y cuminsamento di e siman aki nos a haya informacion oficial cu Repsol y Total ta bay inicia e periodo di exploracion cu nan di tres fase,” Prome Minister Mike Eman ta comenta. “Companianan cu tin conocemento cu ta haci esaki den hopi otro parti di mundo, a dicidi cu Aruba ta suficientemente interesante despues di tur locual a wordo explora caba pa haci e siguiente fase cu ta e boramento real di subsuelo di pais Aruba,” Prome Minister ta comenta. Hernandez di su banda ta bisa cu e ta contento con pais Aruba a coopera cu Repsol pa facilita e investigacionnan te awo. Luis Curet, director di Compania Arubano di Petroleo a elogia Repsol pa e manera extanso con nan a haci nan investigacion, uzando hopi diferente tecnologianan.

 

Frontier Area
E area unda tin interes di haci perforacion ta un caminda unda cu nunca nada a wordo haci pues esaki ta un area cu no ta mucho bon conoci. Esaki seguramente ta risiconan grandi cu ta wordo tuma pero segun Minister de Meza, a base di tur exploracion y datonan cu a wordo tuma, tin suficiente interes cu e dos companianan aki a compromete nan mes di bay haci un perforacion.  De Meza ta bisa: “Den pasado, nos tabata tin tres perforacion cu a tuma luga rond 1989 y lastimamente esunnan ey no a duna e resultado positivo cu Aruba tabata kier a mira. Pero tecnologia nobo aworaki ta hopi cla y mas avansa cual ta mustra nos potretnan hopi mas detaya. Nos ta sumamente contento, y manera semper nos ta bisa, e miho ainda falta pa bini,”