Resultado di test di awa na hotel cu a haci hende malo keto bay den su fase di finalisacion

Ainda resultadonan no ta cla di locual ta e causa cu tanto trahado y huesped a bira malo despues di bebe awa na hotel Divi VIllage. Siman tras di siman nos matutino ta ricibi informacion cu e ta den fase di finalisacion, mientrastanto personanan cu a bira malo ta demanda un copia di resultado y pues pa esakinan keda haci publico.

Yvette Geerman di e seccion di inspeccion y higiena na Departamento di Salud Publico a bisa Bon Dia: “Ainda ta trahando riba e finalisacion di e rapport, ora cu e termina mi ta kere cu lo sali un comunicado of mas informacion tocante di esey. Aworaki ainda ta trahando riba e rapport, diferente departamento tin participacion den dje, di Departamento di Salud Publico (Despa)  pues cada uno mester duna nan banda  di locual cu ta regarda nan tereno.”

Bon Dia Aruba a puntra Sra. Geerman cuanto tempo mas esaki lo dura mirando cu e caso aki a tuma luga na februari. El a bisa cu no tin calculacion di tempo y e ta den  fase di finalisacion. A mustra Sr. Geerman riba e diferente  remarca y comentario nan cu nos matutino a tuma nota di dje, entre otro riba Facebook di Departamento di Salubridad mes. Personanan cu ta exigi un resultado. El a bisa cu ta miho e ora por tuma contacto cu departamento di informacion pa wak si nan tin mas detaye. Den contacto cu e departamento di informacion nan a informa na nos cu nan tampoco tabatin ningun informacion pa duna nos matutino y pues a dirigi nos na e team di maneho kende na su turno no tabata disponibel durante dia. Esaki no ta e prome ocasion cu nos matutino a purba ricibi informacion di resultado di e test indicando kico a causa e fayo y kico a haci e personanan malo, mas bien ta algo cu nos a keda haci continuacion di dje desde 1 siman despues di e incidente cu a tuma luga na februari. Semper nos a wordo bisa cu basicamente ta kedando cla cu ultimo detayenan di e rapport.

Situacion

Tabata mas o menos fin di luna di februari cu diferente keho di turista y empleadonan a yega na salubridad pa loke ta un posibel contaminacion di awa na un hotel. Departamento di Salud Publico hunto cu e representantenan di e compleho a organisa un accion urgente pa alivia e situacion y a tuma tur e medidanan necesario pa contene y coregi e daño mas lihe posibel. E sistema di awa potabel di e compleho a wordo trata bou di guia di Departamento di Salud Publico. Por informa cu e investigacion a demostra cu e contaminacion di awa a sosode riba tereno di e hotel mes y no cu e awa a yega na e compleho contamina. Desde e momento ey e hotel conhuntamente cu Departamento di Salud Publico a bisa di lo bay establece causa di e contaminacion di awa. Unda cu lo laga X-ray e sistema di tuberia cu ta bou tera pa por saca afo unda e contaminacion por ta. Informacion extra oficial cu nos matutino tin tambe ta cu e tuberianan aki mientrastanto a wordo cambia caba na e hotel cual ta indica cu algo mester tabata robes.