For di fuente fidedigno nos a haya informacion cu despues di un proceso di solicitud habri a nombra sra. Robin-Ann Didder y sr. Samuel Dumfries como interim manager na Colegio San Nicolas. Den comunicacion cu ministro encarga cu enseñansa, sr. Rudy Lampe, nos a haya confirmacion di e nombramento aki.
Nos a tende di diferente candidato cu ta docente ‘eerstegraads’ es decir cu tin un estudio universitario y cu hopi experiencia den enseñansa cu a solicita y cu obviamente no a ser considera. Esaki ta yama pregunta, pasobra den e caso di sra. Didder ta trata di un docente ‘tweedegraads’ cu no asina tanto experiencia, ken apenas desde augustus 2018 ta director adhunto na Dienst Publieke Scholen.
Sra Didder ta actualmente adjunct-directeur di Middagmavo, y den pasado tabata miembro di management team di Serlimar unda el a haya retiro despues di un incidente relaciona cu maneho financiero cu a haya critica fuerte for di Conseho di Supervision di Serlimar.
Drs. Samuel Dumfries ta biologo y a eherce diferente funcion den enseñansa, na Arubahuis y como senior advisor na ministerio encarga cu Medio Ambiente.
