Partido HTC ‘Hobennan Treciendo Cambio’: ‘Nos ta enfoca riba algo miho, pa tur hende bay dilanti’

Algun dia pasa, medionan di comunicacion local a wordo convoca pa un conferencia di prensa, cual a tuma luga ayera tardi, pa duna di conoce un partido nobo cu ta yama HTC ‘Hubentud Treciendo Cambio’. Esaki ta conforma di hobennan entre 18 pa 30 aña cu tin e meta di trece un cambio pa e pais y pa e generacion di e futuro, segun loke nan a declara.

“Nos tur como hoben merece un oportunidad, abo como hoben incluyendo tur e mucha di Aruba y ciudadanonan, ki futuro lo tin pa bo cuminsa pone pia abou y demostra cu nos como hoben y henter pueblo tambe tin voz”, Josue Silva, miembro di e partido, a lesa.

Esaki tabata parti di un discurso cu nan a duna pa comunidad conoce kico ta nan intencion- y metanan. Nan a informa cu dia 23 di juli e partido aki a bira oficial. Ademas mes nan a menciona cu nan no ta afilia na otro partido y ta consisti di diferente hoben cu kier yuda pa e pais aki bira miho pa tur, e parti electoral y KvK ta den proceso.

Gilbert Webb, lider di partido, a comenta cu loke partido HTC ta presenta ta loke lo yuda tur hende y nan yiunan pa tin un miho futuro riba e pida di baranca aki. Ademas el a señala cu na momento cu e partido ta asina leu, lo presenta su programa di cambio, cu ta diferente pa e pais cu tin como un prioridad e topico di abuso sexual, cu lo cambia ful e sistema di castigo di Aruba.

Tambe el a informa cu nan lo kier trece un sistema structural cu tin como obhetivo elimina hopi impuesto y carganan pisa pa pueblo di Aruba, incluyendo persona priva y comercial.

Un cu ta parce interesante, ta esun di crea un universidad na Aruba cu prijsnan rasonabel y cu mas di 60 facultad.

Di loke ta trata e situacion cu Gobierno di Aruba ta bibando, Webb a expresa cu ‘loke ta pasando aworaki ta mesun cos cu ora bo tin un scol y tur muchanan ta pleita, mester tin un juffrouw pa para nan. Esey no ta e bida cu nos kier’.

“Por ta bo yiu kier bira dokter of abogado, pero door di e sistema na Aruba, nunca bo ta bay haya cu tur hende ta bay logra nan meta y nan deseonan. Ta p’esey nos t’ey aworaki como hoben pa para dilanti pa yuda nos hobennan na Aruba.”

Tocante partidonan tradicional, el a declara cu e sistema no ta funcionando. Tin añanan cu no ta funcionando y asina e no ta bay funciona.

Tambe Webb a trece dilanti cu aworaki nan no tin fondo pa haci campaña. Si algun persona lo kier colabora cu nan, mester tene na cuenta cu si kier duna un aporte, nan no lo haci ningun fabor back pa ni un persona. “Tur cos cu nos ta haci ta di curason.” Nan plan ta pa cana pa cada negoshi y cada cas pa papia personalmente cu e hende, Webb a bisa.

Tambe el a expresa cu aworaki nan tin un comision cu a wordo lanta aparte, ‘pasobra nos no ta traha manera e otro partidonan a traha’. E sistema onderzoek afdeiling ta pa e persona cu ta interesa pa pasa un screening completo y asina drenta den partido.

Asina mes, nan a informa cu e colornan cu ta representa e partido ta preto cu ros, colornan cu e mayoria di hobennan ta gusta bisti.

Pa finalisa, Lismara Rustveld, kende tambe ta miembro di e partido, a specifica cu tin hende cu ta gusta critica y hari pa e accion cu nan a dicidi di lanta un partido di hobennan nobo. Pa cu esaki el a expresa cu nan ta un ekipo, cada persona tin un pasado, pero cada ken e pasado ta haci loke nan ta aworaki cu nan kier un cambio. “Nos ta enfoca pa algo miho, pa tur hende bay dilanti.”