Ronella Tijn Asjoe-Croes, ATA: ”Negoshi di huur apartamento ta afectando sector hotelero”

Den cuadro di e fenomeno internacional di otro acomodacion cu awor tambe ta afecta nos pais, Bon Dia Aruba a hiba un combersacion cu CEO di Aruba Tourism Authority (ATA) Ronella Tijn Asjoe-Croes kende a bisa cu negoshi di ”Sharing Economy” ta actualmente un tendencia mundial. Diferente acomodacionnan y casnan ta wordo poni disponibel riba un plataforma manera ‘AirBnb’, pero tin hopi mas plataforma manera esaki. Na Aruba, e cantidad di propiedad cu tin registra riba ‘AirBnb’ ta mas cu 300 for di 26 di Februari segun Sra. Croes pero ainda mester specificamente confirma esaki.

E cifranan ta papia pa nan mes
Pa Aruba, segun Sra. Croes ta splica, ATA ta cualifica e tipo di acomodacion aki como  otro cual ta adresnan priva, casnan cu ta wordo ofreci pa huur, apartamento etc. Banda di Otro bo tin Low Rise, High Rise & Time Share entre otro. Aña pasa e tipo di acomodacion cualifica como Otro  a subi 33% cual tabata 13% den 2009. Esaki ta duna bo un idea cu en berdad e mercado hotelero ta mira e fenomeno aki cu no ta necesariamente algo negativo. Esaki ta pa motibo cu bao di otro bo ta haya Villas, casnan y apartamentonan cu ta basta atractivo cu tur cos den ordo y den bon condicion. E hecho cu den e mercadonan manera America, Hulanda, Colombia, Brazil, Inglatera y Italia bo ta mira un crecemento di e tipo di acomodacionnan aki ta bisa bo cu bo no mester pensa den contexto di apartamento barata so segun Sra. Croes ta conta Bon Dia. Tin hende cu ta haya esaki mas facil, tin otronan cu kier huur un cas cu un pool pa nan famia completo.  Pa loke ta trata apartamento barata, segun Sra. Croes e ta kere e fenomeno aki ta mas bao di e mercado Venezolano pa motibo cu actualmente tin hopi turista cu ta bin djis pa haya acceso na e Dollar. Nan ta cumpra productonan pa nan bende y nan ta spaar riba nan acomodacion mientras cu nan ta na Aruba.

Mester legislacion pa por actua debidamente
Segun Sra. Croes ta conta Bon Dia, mester introduci hopi solucion pa por cuminsa maneha e situacion aki un tiki mas miho. Un di e solucionnan aki ta segun Sra. Croes pa tin miho legislacion pa autoridadnan por controla e calidad di acomodacionnan cu ta wordo ofreci. Pa ATA, tin mester di un inventario completo di tur e acomodacionnan aki. Mester verifica cu e calidad cu ta wordo ofreci ta na su luga y mester pensa te hasta entre otro riba e parti di siguridad. 

Tambe locual ta hopi importante ta pa tur esnan cu ta haci negoshi den sector di turismo mester cumpli cu e regla di paga impuesto. ”Di parti di seccion hotelero nan ta haya cu esaki mester ta husto, tur hende mester cumpli cu nan rekisitonan y tur hende mester por paga nan impuesto. Un di esakinan ta e debido ‘Room Tax’ cu hotelnan ta paga y esaki ta ATA su entrada primario cu ta financia entre otro promocion y mercadeo pa nos isla. Hopi hende ta beneficia di esaki pero nan no ta contribui, anto esaki no ta husto.”  Sra. Croes ta agrega.  

E intencion no ta solamente pa cualifica y categorisa e tipo di acomodacionnan aki, pero tambe por ehempel pa ta den contacto cu esnan cu ta den e negoshi aki y pa ta alinea cu ATA. 
Esaki ta e realidad di turismo awendia no solamente riba Aruba, pero algo cu ta expandiendo rapidamente rond di mundo. Conforme cu esey, Sra. Croes ta splica cu ATA a anuncia recientemente cu nan lo hiba un maneho unda cu nan lo incorpora e realidad nobo aki. Esaki kemen cu lo bay traha riba tur e puntonan aki cu a wordo menciona y na otro banda, ATA tambe ta bay evalua ki tipo di mercadeo y promocion por wordo haci incluyendo e otro tipo di acomodacionnan aki. Gemeente Amsterdam tin un acuerdo cu ‘AirBnb’ y pa e motibo aki tambe ATA a reuni cu Gemeente Amsterdam siman pasa pa evalua e tipo di pasonan ki cu por wordo tuma en cuanto negoshi di huur apartamento na Aruba.