Airbnb efecto ‘codigo cora’ Corsou, Aruba mercado diferente; Aruba no mes afecta

Minister encarga cu Turismo Otmar Oduber ta mustra di tin atencion pa e desroyonan di plataformanan cu ta huur cambernan na turistanan manera Airbnb y efecto pa Aruba. E ta mustra cu esfuerso di gobierno, Ahata y hotelnan ta importante pa competi cu otro acomodacionnan. Tambe cu nos tipo di bishitantenan ta keda mas den hotel compara cu Corsou.

Na Corsou hotelnan ta bashi, como cu turistanan ta opta bay keda den otro tipo  di acomodacionnan ora di vakantie. A puntra Minister Oduber su opinion riba esaki y e situacion na Aruba. El a bisa cu p’esey e ta menciona cu strategia ta importante. Na Aruba e hotelnan y e cantidad di cambernan cu tin, hopi hende ta depende di nan pa nan trabou cual ta e discusion cu tin. Den otro acomodacionnan bo no tin tanto e servicio cu tincu wordo brinda. Bo no tin e housekeeping cu mester ta tur dia presente pa haci e cambernan limpi, bo no tin e bell man na porta, bo no tin frontdesk cu mester di personal constantemente, bo no tin restuarant of bar y koki y waiter cu mester traha. Kiermen nos strategia ta keda consentra fuertemente pa atrae e turista cu ta bay sigui keda den hotel. Sinembargo bo no por kita for di bista y bo no por kita for di realidad cu e mundo di turismo ta keda draai y ta cambia y plataformanan cu nos ta yama Airbnb, FlipKey y otronan cu ta forma 7 – 8 cu ta basta grandi na e momentonan, aki ta crea competencia pa hotelnan.

Corsou

E situacion na Corsou ta loke nan ta yama ‘code rood’ despues cu pa do luna sigui, mitar di e cambernan di hotel ta bashi. Esaki ta resalta particularmente como cu vuelonan pa Corsou si ta yen, te hasta KLM y TUI mester a extende nan planificacion di vuelo pa e temporada di zomer te na winter. Indicacion cu e turista tey si, pero ta scoge pa otro acomodacion.

Competencia pa hotelnan mundialmente

“Aña pasa September durante conferencia di turismo, durante siman di turismo, mi a notifica AHATA e tempo ey na un forma hopi cla cu si hotelnan no pone nan mes na nivel di e competencia cu tin. Cu hotelnan ta bay perde e trein cu ta bay pasa y laga nan. For di e tempo ey caba por a wak cu e plataformanan tabatin gran cantidad di cambernan, casnan, hotelnan timeshare unda cu doñonan di esakinan ta pone nan cambernan na huur pa turistanan. Esaki no ta na Aruba so, sino mundialmente.”

Proceso reservacion mas facil

Segun Sr. Oduber a sigui splica  segun investigacion, mas y mas e turista afluyenda ta cuminsa uza e plataformanan aki como cu nan ta simpel. Bo ta pidie, bo ta reserva hopi facil y hopi biaha hotelnan, si nan no tin nan sistema actualisa e ta dura bo por ta mas largo. E espera y transaccionnan por ta hopi mas dificil ora ta hacie na un  hotel, compara cu ora ta hacie riba platafroma di otro acomodacionnan manera Airbnb etc.

Strategia Aruba

Segun e mandatario ta mustra riba e retonan cu tin cu hotelnan, e ta mustra tambe riba e strategia di Aruba y ta enfatisa cu e no por papia pa locual cu ta sosode na Corsou, como cu nan tin nan mesun gobierno y strategia. E resultado cu nos ta mira na Aruba cu ta depende di turismo hopi mas cu Corsou, Naturalmente ta tuma esfuerso di tur hende. Di gobierno, Ahata, hotelnan, tur hende ta tira un tiki awa den biña pa por ehempel prijsnan ta mas competitivo pa mantene e grado di ocupacion. Cu ta pone cu bo Revpar por keda wordo manteni mas o menos na e nivel cu a conoce crecemento di dje, durante e ultimo 5 pa 6 añanan, Sr. Oduber a splica

Diferencia mercado Corsou vs Aruba

“Mi ta kere cu e mercado di Corsou ta totalmente diferente cu esun di Aruba. Nan ta concentra hopi riba e mercado Europeo. Mi ta kere cu e mercado Europeo ta uno cu pa definicion ta uno cu ta gusta propiedadnan caminda nan ta keda hopi mas largo. Nan no ta keda un siman / 7 dia manera averahe na Aruba. Nan ta keda entre 14 pa 21 dia, pa e motibo aki nan ta prefera busca un cas of condominium. Y e mercado cu Corsou ta atrae ta hopi mas den e direccion aki, cu ta haci cu nan ta sinti e efecto den hotelnan hopi mas cu na Aruba.

ATA

Na maart ATA a informa cu negoshi di huur apartamento ta afectando sector hotelero y februari tabatin mas di 300 propiedad di Aruba registra riba dje cu ta encera adresnan priva, casnan cu ta wordo ofreci pa huur, apartamento. Bou di ‘Otro’ tin Low Rise, High Rise & Time Share entre otro. Aña pasa e tipo di acomodacion cualifica como ‘Otro ‘ a subi 33% cual tabata 13% den 2009.