Duaneronan na puerto di Rotterdam ta haya sa na momento cu nan yega trabou kico exactamente nan ta bay haci riba nan dia di trabou. Asina ta purba baha chens cu traficante di droga ta pidi nan pa laga cierto carga pasa sin inspeccion.
Alcalde di Rotterdam Ahmed Aboutaleb a bisa cu e personalmente a zorg pa haci dificil pa duaneronan no haya nan den situacion unda por bay cu deseonan di criminalnan. Ademas di haya sa na momento cu nan yega trabou kico nan tarea lo encera riba cada dia di trabou, nan ta cambia di tarea cada mita di dia. Hasta ora nan cambia di tarea no ta conoci te na ultimo momento riba ki carga nan lo bay traha.
Tin corupcion andando bou duaneronan. Cuminsamento di aña tabatin 3 detencion di duanero pa sospecho di a laga droga pasa sin inspeccion, cual e duaneronan lo a haya paga pe. Ademas a aparece un caso den corte contra ambtenaar Gerrit G y tin un procedura andando contra otro ambtenaar di e cuerpo.
Segun e cuerpo su Vocero Roul Velleman, laga otro coleganan of computer determina ki trabou lo tin cada dia ta baha e chens cu acto corupto por tuma luga. Mientras tanto Aboutaleb a biaha luna pasa pa Colombia pa papia cu autoridadnan Colombiano riba preveni crimen. Di e pais Latino Americano mayoria di e cocaina ta drenta via Rotterdam. Segun investigacion di Erasmus Universiteit, criminalnan di droga por haci y deshaci na e puerto.
