Hulanda y Gobierno di Corsou a yega na un acuerdo pa e entidad di reforma y recuperacion. Ayera, Secretario di Estado pa Asuntonan di Reino Raymond Knops y Prome Minister di Corsou Eugene Ruggenaath a firma e acuerdo cu ta pone den accion de proceso pa legalisa entidad Caribisch orgaan voor hervorming en ontwikkeling, COHO.

E acuerdo ta bisa cu Gobiernonan di Hulanda y Corsou tin e intencion pa lanta e organo, basa riba articulo 38, inciso 2 di Statuut cu bista riba bienestar di comunidad di Corsou, unda lo promove reformanan na nivel di administracion, finanzas publico duradero, y haci economia di e pais resiliente, reforsa cu e base huridico unda mester.

COHO lo tin como tarea, entre otro, e sosten di y supervision di desaroyo y ehecucion di proyectonan y medidanan pa organonan publico y companianan di Gobierno. Mirando e situacion financiero-economico di Corsou e ta crucial pa prome cu yega na e rijkswet COHO, cuminza cu ehecucion di e landspakket. E landspakket no por sigui como un areglo independiente si no yega na un rijkswet.

Landspakket

Como tal ta acorda, cu e landspakket aki ta parti integral di e acuerdo, y cu e partidonan ta sigui palabracionnan cu ta describi den e pakete. Pendiente e implementacion di e rijkswet COHO, Hulanda lo institui un organisacion di trabou temporario denter di e Ministerio di Asuntonan Interior y di Relacion di Reino,.

Pa dia prome di Februari 2021 pa mas tarda, Corsou y Hulanda lo establece un agenda di ehecucion bou guia di e organisacion di trabou aki y den colaboracion cu e Ministerionan envolvi.

Lo por haci cambio of haci agregacion, por escrito, den e acuerdo si partidonan ambos ta aproba esaki. Cualkier cambio di contenido lo keda publica den Staatscourant.

E acuerdo entre Hulanda y Corsou lo drenta na vigor riba e dia cu ta pone e ultimo firmanan y ta termina na momento cu e rijkswet COHO ta caduca.

Si mester extende e rijkswet COHO, lo sigui cu e acuerdo te na e ultimo dia cu cua ta extende e rijkswet.

E acuerdo entre Corsou y Hulanda lo stop di existi den caso cu Corsou y Conseho di Minister di Reino ta informa cu no tin consenso rekeri pa e rijkswet COHO of cu e consenso aki a cay afo, of si e proposicion no bira un ley. COHO tambe lo stop di existi si Hulanda y Corsou de acuerdo cu e palabracionnan dicidi pa termina e areglo interno prome cu tempo.

Knops na Tweede Kamer

Mientrastanto drs. Knops a informa Parlamento Hulandes cu e y Prome Minister di Corsou a firma e acuerdo, pa asina posibilita e di tres tranche di sosten di likides pa Corsou y cu mester yuda reforma finanzas publico y economia di e pais. Knops a ilustra cu desde April 2020, Hulanda yuda Corsou cu sosten pa yuda limita e consecuencianan di e pandemia riba comunidad, comercio y labor. “E sosten no ta sin condicion,” Knops a bisa, agregando cu el a informa Parlamento di Hulanda diferente biaha riba e tema. A tarda pa manda e di tres tranche pasobra Corsou no a logra cumpli cu condicionnan di e di dos tranche y no por acepta e condicionnan di rijkswet COHO.

Mientrastanto CFT a conclui cu Corsou a cumpli cu e condicionnan pa e di dos tranche, y mientrastanto a hiba combersacionnan constructivo riba e di tres tranche y e condicionnan. Asina pues, Corsou a acepta e rijkswet pa e Caribisch orgaan voor hervorming en otwikkeling, COHO y pa presenta esaki pa conseho di Raad van State.

Raymond Knops a splica cu COHO lo haya forma di un organo di maneho cu tareanan y autoridad independiente, basa riba ley Hulandes, cu tin e tarea pa percura cu tin reforma na nivel di Gobierno, logra finanzas publico duradero y reforsa resiliencia economico. “Aruba y St. Maarten tambe lo por drenta e rijkswet, na momento cu nan cumpli cu condicionnan (cu ta conta pa nan caso specifico) pa por ricibi e di tres tranche.

Pakete a termino corto

Parti di e consenso rijkswet COHO ta aceptacion di e landenpakket, cu ta un pakete di medida coherente a termino corto y reforma structural a termino largo cu ta necesario pa haci Corsou resiliente riba nivel financiero, economico y administrativo.

Ademas, Knops a informa Tweede Kamer cu Corsou a bay de acuerdo durante e reunion di Conseho di Minister di Reino dia 30 di October, cu ta elimina e Acuerdo di Crecemento, ta adapta e rijkswet supervision financiero y ta ratifica e condicionnan pa e di dos tranche pa sosten di likides den Parlamento di Corsou. Finalmente, Corsou, a bay de acuerdo pa ofrece transparencia maximo y pa duna oido na tur peticion di CFT pa loke ta informacion riba entidadnan di Gobierno. E aceptacion di e condicionnan, ta habri e caminda pa duna e di tres sosten di likides na balor di 105 miyon florin pa e periodo di Juli te cu 31 di December 2020.

CFT lo por, riba peticion di Corsou duna un conseho adicional con leu y bou cua condicion, lo por financia e asistencia pa motibo di perdida di trabou post Covid, for di e espacio presupuestario di e areglonan NOW y ZZP di e pais.

E consecuencianan presupuestario di e di tres tranche lo keda presenta den un ley di presupuesto supletorio na Tweede Kamer. Mirando cu ta trata di un medida di emergencia lo no sigui e ruta normal pa Parlamento Hulandes aproba sosten den e presupuesto di Pais Hulanda.

Enseñansa lo haya ayudo mesora

Cu e COHO lo tin un capitulo nobo di un colaboracion mara na condicion cu mester yuda cu finanzas publico duradero pero tambe lo inverti riba diferente tereno pa yuda desaroyo di Corsou. Mientrastanto ta pone 30 miyon euro disponibel pa mehora enseñansa na Corsou, cu ta bay resorta bou direccion y supervision di COHO. Hulanda ta pone 500 mil euro e aña aki caba pa cuminza drecha dak y percura pa siguridad di e scolnan. Ademas, lo revisa e clima di inversion y maneho empresarial di Corsou cu ta necesario pa refina e pakete di reforma y recuperacion. Lo analisa si tin medionan disponibel na Corsou mes, pero den un caso cu esaki no ta e caso, Hulanda lo por sostene pa medio di un prestamo, regalo, co -financiamento of cu un contribucion departamental. En todo caso, lo inicia un investigacion riba e factibilidad y con realisabel e ta pa yega na un instrumento di garantia pa empresanan di Corsou cu prome cu Covid tabata saludabel. Si tin posibilidad pa un instrumento di garantia, Conseho di Minister di Hulanda lo bin cu un decision politico separa. Paralelo na esaki, lo tin investigacion pa e posibilidad di un cuadro di evaluacion pa sosten individual na comercio di Corsou. Den caso cu logra bin cu e cuadro aki, lo evalua cada caso riba nan mes pa mira si e ehercicio ta bale la pena. Lo desaroya criteria pa esaki, y unicamente si Conseho di Minister di Hulanda evalua e decision, lo pasa pa e cuadro di evaluacion aki. Unabes cu pasa e proceso aki, lo tin un di dos decision politico Hulandes, prome cu bin e sosten financiero. Pa e medida aki, tin un suma maximo di 20 miyon euro.

Estado di derecho

Finalmente, Gabinete Hulandes ta di opinion cu un estado di derecho cu ta funciona ta un condicion pa desaroyo economico, ta contribui na finanzas publico duradero y ta percura pa gastonan hustifica. Como tal, ta pone medionan structural disponibel pa ehecucion di medidanan den e landspakket, cu tambe ta dirigi na fortificacion di e estado di derecho di Corsou. Asina lo tin un suma cu por yega te na 18.5 miyon euro pa sosten adicional na Marachaussee Real, Duana y Wardacosta pa Caribe. Mas ainda lo tin medionan adicional te na 5.2 miyon euro pa mina problemanan na Corsou. Militia di Corsou como parti di Defensa lo ricibi 1.2 miyon euro pa profesionalisacion y pa e trayecto di formacion social, unda ta brinda oportunidad pa hobennan bolbe den sociedad.

Tambe lo pone 400 mil euro disponibel pa harmonisa e nivel di proteccion di datonan personal den Reino. E medionan aki lo keda agrega na e presupuestonan di Ministerio pa Asuntonan di Reino, Defensa, y Husticia y Siguridad di Hulanda.