Ayera a tuma lugar firmamento di e promer acuerdo entre un isla autonomo den Caribe y Hulanda, pa duna contenido y forma na e ayudo cu e isla lo haya. Nos a cuminza tira un vista riba contenido di e acuerdo aki, a pesar cu lo tin hende lo bisa cu esun di Aruba lo ta bastante diferente.

Nos no ta kere esey y cu nos motibo. Tradicionalmente Hulanda ta trata di mantene uniformidad den nan maneho pa cu e islanan; esey ta conta pa asunto manera legislacion, pero tambe den proyectonan grandi manera e ayudo aki di hopi aña ta logico cu no ta bay tene cuenta cu tur tipo di deseo diferente di e islanan, a menos cu e deseonan ey tin un motibo valido. Tambe tin naturalmente e diferencianan cu ta consecuencia di e ruta diferente cu e islanan tabatin den pasado pa loke ta e supervision financiero, cu den caso di Corsou y Sint Maarten tin relacion cu e saneamento di debe y e institucion di un supervision financiero via un ley di Reino desde inicio.

Aruba a cana un caminda diferente unda e intervencion y supervision financiero a bin despues di e maneho desastroso di gobierno anterior cu a pone nos debe publico surpasa e nivel di cuatro mil miyon florin. Cu a hinca esaki den un ley local envez di unda e ta pertenece, den un ley di Reino, tabata mas bien pa gaña wowo di hende cu no ta asina bon informa den e tipo di asunto aki. Si gobierno di Aruba ta bisa cu nan ta casi cla cu Hulanda pa firma, anto nos por supone cu e asunto aki ta regla caba. Sin embargo, den su intervencion den Staten ayera nos no a tende Promer Ministro referi na esaki, loke ta laga na duda ainda si tin un acuerdo caba pa un ley di Reino separa pa Aruba pa supervsion financiero .

Tin otro aspecto cu si nos ta kere ta bay ta (casi) mescos pa Aruba. Por ehemplo encuanto e fluho financiero cu e organismo supervisor yama COHO, un nomber un poco incomodo na Papiamento por cierto, pa por “inicia, promove y ehecuta programa y proyecto autonomamente, otorga subsidio na ciudadano y empresanan, incluyendo empresa estatal, o tambe participa den capital di accion (aandelenkapitaal) di empresanan. Tal inversionnan ta sirbi pa implementa, fortifica y complementa reforma y medidanan y ta contribui na e obhetivonan general di e paquete di e pais”. Esaki ta un di e puntonan cu aki na Aruba tambe a haya hopi comentario, tambe di esnan cu tabata vocifera cu Hulanda tabata di bende o take over e empresanan estatal. Esey no ta parce nos e peligro. Si yega na permiti e organo di supervision cumpra accion den un cierto compania estatal, esey nunca ta tuma lugar sin cu e accionista unico, pais Aruba, bay di acuerdo.

Otro asunto cu ta bin dilanti den e acuerdo menciona ta e punto di e ‘liquiditeitssteun’ pa cierto medida specifico manera subsidio di salario, areglo pa apoyo na empresa (NOW-regeling) y hasta gasto pa cierto servicionan clave cu ta riba presupuesto normal, “tanten esaki ta razonablemente necesario y un pais ta cumpli cu e condicionnan estableci”. Ta parce nos cu esey den e caso di Aruba lo ta aplicable tambe. Esaki ta un di e puntonan mas importante pa henter comunidad, mirando e situacion cu ta reinando actualmente. Straño tabata anto pa tende e ministro encarga cu Labor y Asunto Social declara durante tratamento di e presupuesto complementario cu posiblemente e ayudo aki, por keda “transforma” y cu por surgi un situacion hopi dificil. Nos no a comprende bon kico e mandatario tabata implica cu esaki, pero ta trece duda atrobe si berdad nos ta cerca di un acuerdo cu Hulanda.

Remarcable tambe nos a haya un observacion den e acuerdo di Corsou cu hasta prestamo pa inversion di capital ta posible, por ehemplo pa inversion cu no ta conecta directamente cu e landspakket pero cu ta considera necesario, en principio via e ruta regular via Cft. “Sin embargo, lo ta indeseable si e gobierno di un pais ta atrae prestamonan cu ta diametralmente contrario na e reforma y inversionnan acorda den e landspakket. Pa e motibo ey COHO ta keda autorisa pa duna un evaluacion di contenido di e prestamo intenciona.” Esaki ta parce nos un tipo di ‘safety valve’ pa evita cu un isla ta acorda su propio maneho financiero cu por ta contraproducente pa e proyectonan di e entidad di reforma. Nan no por para e prestamo pero por duna un conseho na esun cu si por para esaki… Cu na e altura aki ta pensa riba e tipo di garantia pa cos no sali for di man ta bisa suficiente tocante e confianza cu tin…

Aunke den tratamento di presupuesto complementario 2020 ayera no a tende tanto cu por a duna e impresion cu e acuerdo tan anticipa cu Hulanda ta ‘casi cla’, nos por mira den e acuerdo di Corsou hopi di loke lo bay conta pa Aruba tambe. Nos no ta mira nada dramatico cu ta haci cu por keda mantene henter comunidad den un limbo innecesario. Importante ta e alivio necesario pa miles, trahador y empresario, cu no sa con pa caba aña, te pa sa con pa cuminza esun nobo.