Nos hermana isla Curaçao a manece cu un desorden di otro mundo pa e salarionan exorbitante cu mayoria di pueblo ta haya un scandal. Pio ainda ora esaki ta sali na luz di dia na un momento cu e isla ta pasando den un situacion financiero dificil y bon parti di e poblacion tin problema grandi pasobra fin di nan placa ta yega prome cu fin di luna. Pa varios aña caba economia ta den recesion, pero esey no a yuda pa para e politiconan di pleita, hasta cu esey a bira mas grave ainda, terminando den un prome ministro cera pa tres aña, y otro pa asesinato di un rival politico.

Den e ambiente ey e revelacion a cay manera un bom y por anticipa cu e asunto aki ta bay haya su consecuencia. Mesora tambe politiconan Hulandes no ta laga e oportunidad pasa pa mustra atrobe cu riba e islanan aki definitivamente ‘nan no sa con pa maneha nan asuntonan.’ Por lo pronto nan lo haya rason tambe, pasobra e echonan ta punta den e direccion ey. Esey no ta kita cu na nan propio pais regularmente ta sucede cosnan cu no mester sucede, pero nos mester reconoce cu nan ta bastante mas dinamico den busca solucion pa e asunto. Asina pa bastante tempo caba ta existi e asina yama ‘Balkenendenorm’ cu ta bisa cu gobierno no por permiti cu den sector publico ta paga salario cu ta mas halto cu loke e prome ministro ta gana. Pa 2019 e norma ey ta € 187.000 y esey ta incluyendo vakantie-uitkering, bonus di fin di aña, contribucion pa pension, etc. E norma ta bisa cu ningun salario por ta mas cu 130% di e salario di prome ministro Hulandes.

Si nos mira awor cu tin empresa estatal na e isla bisiña cu ta gana riba un miyon florin, bo mester puntra bo mes si nan trabao ta trece cune un responsabilidad asina grandi cu un salario asina ta hustifica. Mirando cu e isla ey ta riba un ‘pijnbank’ Hulandes caba, pa logra corta gasto y, mes of mas importante, trece economia atrobe riba un caminda sano, ta imaginabel cu ta duna oido na e indignacion general cu ta reina actualmente. Anto net na momento cu sindicatonan ta subi caya pa protesta contra e medidanan cu gobierno mester bay tuma… Con e asunto aki ta bay termina, nos no sa pero tin algo cu nos aki na Aruba mester haci: puntra nos mes si nos ta miho, mescos o pio cu na e hermana isla… Ban tira un bista.

Nos tin e caso bastante reciente di e retiro di director di Utilities unda e sentencia ta bisa cu e salario bruto pa luna tabata Afl. 22.000 pa luna. Riba esey tabatin diferente otro ‘emolumenten’ cu ta haci e salario total mas halto ainda, posiblemente mas di Afl. 300.000 riba base anual. Pa tur claridad, nos no a scoge e ehemplo aki pa expone e persona, pero transparencia ta biba asina mal bida riba e isla aki, cu ta solamente via e tipo di documento aki, sentencia di corte cu ta bira publico, nos ta haya un bista riba e magnitud di salario cu ta paga den e top di e tipo di empresa publico aki.

Y den esey nos no kier tende di banda di gobierno, cu diripiente e compania ta ‘independiente’ of ‘autonomo’ y no por impone nada, pasobra ora ta trata di impone boluntad di gobierno no ta ripara nada di e famoso independencia ey.

Tin un otro aspecto mas di salario exorbitante, y esey ta pago di consehero. E mesun caso di Utilities aki ta trece dilanti e sumanan grandi cu a paga e companianan Mind Strategy y Horizon. En total den e tempo cu e director concerni tabata responsabel pa maneho di Utilities, a gasta Afl. 1,3 miyon na consultant. Conclusion: obviamente mayoria di nos ta opera den e categoria robes, unda e tema no ta kico nos ta haya, sino kico nos mester paga…

Di otro banda, nos ta tende pa añanan caba e argumento cu e responsabilidad den e companianan aki ta asina grandi, cu mester paga e personanan aki e tipo di placa ey, sino nan no ta hacie. Nos ta duda di esey, pero hasta si e ta berdad, ban cuantifica anto pa cada puesto kico ta e peso y responsabilidad cu cada director mester carga, y yega na conclusion cu ta di conocemento publico.

Naturalmente e pregunta ta surgi tambe kico ta e situacion dentro di e actual gabinete. Nos tin nan promesa cu nan no lo yega na e extremo di e gabinete anterior, pero con nos por controla esey? Nos mester warda te cu oposicion ta bin trece cierto informacion afo, pa nos bay evalua si ta berdad of exagera? Den e caso ey, no ta miho pa nos cuminsa di biaha cu drecha e cosnan aki y no papia so di transparencia, sino practica esaki tambe? Regularmente nos ta toca e tema aki, pero nos no ta mira nada cambiando. Tin cierto entidad den sector publico cu ta cumpli cabalmente cu nan deber di publica, y den e otro casonan… silencio, tambe pa banda di e mandatarionan concerni. No tin boluntad?

 

LEAVE A REPLY

Please enter your comment!
Please enter your name here