Te ainda un decision no a cay si Parlamentario Sue Ann a dicidi di hala atras su decision inicial di entrega su stoel na partido; of si ya caba a wordo defini kende lo asumi e vacatura cu Parlamentario Ras ta laga den su fraccion. “Te ainda conseho di partido no a tuma un decision riba dje,” asina lider di fraccion di MEP, Rocco Tjon a declara.

El a laga sa cu despues cu Presidente di partido di MEP, Hendrick Tevreden a duna un splicacion amplio riba e proceso cu lo sigui despues cu Parlamentario Ras su decision a wordo conoci publicamente dia 8 di juli ultimo, niun decision a cay ainda. Pero denter di poco presidente di MEP lo elabora riba e decision final rond di e futuro di Parlamentario Ras su stoel den nos organo legislativo.

Unabes cu Parlamentario Ras a entrega su carta di retiro, el a bisa cu e no lo bira independiente, y e asiento ta keda pa Conseho di Partido dicidi riba dje. Pues ta keda na partido pa evalua -segun Parlamentario Tjon- si nan ta acepta e renuncia aki si of no.

Parlamentario Tjon, como Lider di Fraccion, a bisa cu mirando e desaroyo actual cu tin di haber cu Hulanda, tambe pa loke ta e Plan Crisis Social, nan ta haya importante pa sigui conta cu e conocemento y sosten di Parlamentario Ras.

Parlamentario Tjon a indica cu e Plan Crisis Social ta un proyecto cu su colega Sue Ann Ras a traha hopi duro riba dje, sigur pa loke ta e parti di control. “Mi ta kere tin desaroyonan actual hopi importante pa nos pais andando cu como partido, mi ta kere nos mester evalua esaki hopi bon,” el a bisa.

Parlamentario Ras a dicidi di entrega su retiro for di Parlamento, pa loke a sosode na Hulanda, ora cu el a wordo graba mirando un pelicula den pleno Reunion Inter Parlamentario di Reino (IPKO).

 

 

LEAVE A REPLY

Please enter your comment!
Please enter your name here