Ayera San Nicolas Business Association (SNBA) a convoca un conferencia di prensa pa duna mas informacion tocante nan Business Summit cu lo tuma luga na Santa Teresita Center na San Nicolas. E cumbre lo cuminsa mañan pa 9or di mainta.

Presidente di SNBA, Andres Hernandez a bisa cu nan ta na bispo di e accion mas grandi cu a yega di tuma luga durante e ultimo decadanan den e districto aki. Den e cumbre aki nan lo tene tur e partnernan den e tuma di decision, pa hunto entrega solucionnan pa loke ta San Nicolas y pariba di brug.

E cumbre aki ta busca accion concreto y inmediato pa wak San Nicolas su actividad y desaroyo crece prome cu fin di aña. Y no cu plannan of promesanan, nan a bisa. “E ta bay ta senciyamente accionnan cu nos tin mester na San Nicolas y pariba di brug pa nos cambia e situacion cu nos tin actualmente, comercialmente y inclusivo socialmente”, el a bisa.

Herold Tevreden, kende ta secretario di SNBA, a bisa cu esaki ta e cumbre cu nan a yega di organisa pariba di brug. Ya cu ultimo tempo e situacion ta tenso, pa no bisa malo. Nan a bin cu e idea di bin cu e cumbre aki pa wak kico nan por haci den e proximo 6 luna pa cambia tur locual ta sosodiendo pariba di brug.

El a menciona cu di e ultimo 20 miembronan cu ta solamente concentra den nan caya principal, un cantidad di 5 pa 6 lo bay cera nan porta na januari si nan no ta tuma un accion. Door di esey nan a organisa cumbre aki, caminda nan lo bay comparti hopi informacion. Tin un serie di proyecto concreto cu lo bay wordo desaroya den e proximo semester pa San Nicolas.

 

 

1 COMMENT

  1. Hende mester stop di ganja cu nan ta interesa den San Nicolaas: ami a nace biba y lanta na San Nicolaas, busca pa sa e berdad, cuanto hende riba e potret nan mes ta biba, shop y hasi negoshi den San Nicolaas, pone un bus core free di San Nicolaas pa Oranje Stad pa Turista: e ora ey San Nicolaas tin help.

LEAVE A REPLY

Please enter your comment!
Please enter your name here